Tin dos luna pa yega na otro
ORANJESTAD (AAN): Durante un conferencia di prensa, Aldrich Croes, Propietario di e radioemisora Hits 100FM (Q-Waves N.V) hunto cu su abogado Gabriela Sjiem-Fat presente, a duna un declaracion relaciona c'un kortgeding cu a tuma luga diabierna ultimo entama pa Abogado David Kock cu a representa su cliente DUCAPRO.
Abogado Gabriela Sjiem-Fat a cuminsa bisando cu DUCAPRO a entama un caso sumario contra di Hits100FM, puntrando hues permiso pa blokia Hits100 di toca musica di cualkier artista cu nan sa representa.
E prome pregunta tabata cual ta e artistanan aki cu ta referi na dje pasobra no tabatin claridad riba ken DUCAPRO ta representa. Si lo tabatin claridad riba esey, e ora lo a haya sa ken a podera DUCAPRO pa actua di parti di e artistanan aki, a bisa.
Hues a compronde e posicion di Hits100 FM y tambe a puntra DUCAPRO pa clarifica ken nan ta representa. A bin na cla cu nan ta trahando cu un organisacion internacional, cu por lo menos na Hulanda, tin autoridad pa actua den defensa di derecho di autor.
Sjiem-Fat a splica cu na Aruba no tin actualmente ningun base legal cu ta apodera un organisacion specifico pa haci esey. DUCAPRO tin intencion pa haci esey pa e islanan den Caribe, a indica.
Aworaki, Hits100 FM no ta wak pakico mester paga DUCAPRO un suma mensualmente si acaso nan no sa ki derechonan nan ta haya y cual musica nan por toca.
Hues a compronde e posicion di ambos partido y a duna dos luna di tempo pa sinta na mesa y yega na un solucion aceptabel, no solamente pa Hits100 FM pero pa tur e radionan envolvi como tambe establecimentonan cu lo wordo involucra den e sistema nobo di permiso aki, e abogado a duna di conoce.
Banda di esaki, Aldrich Croes a laga sa cu te ainda no sa nada di e organisacion aki. A puntra den corte y e intencion ta pa e organisacion aki bay cobra e tarifanan cu nan tin pensa di bay implementa. Den e siguiente dos lunanan ta bay negocia kico lo ta e cobransa aki.
POSICION DI HITS100 FM
Croes a señala cu nan posicion ta cu nan no ta contra pa paga. "Nos kier paga. Nos kier ta legal. Bo kier ta safe online y tin aire riba frecuencia modula FM. Pero nos kier sa ken nos ta paga, con e structura di e organisacion ta cu ta bay bisa cu nan ta bay papia artistanan, pasobra nos tambe kier wordo cubri y sa cu loke nos ta paga ta wordo bon uza pa paga e artistanan. E placa cu nos ta bay paga, manera nos abogado a bisa, e placa no ta wordo gana facil".
El a enfatisa cu e radionan na Aruba ta den un situacion hopi particular. Den apenas 30 kilometer di largura, e pais aki cu 115 mil pa 120 mil habitante, nos tin 22 radio y 21 ta comercial. Nan tur tin e posicion cu nan kier paga, pero e dilema ta cu nan lo kier paga un suma cu ta un suma husto pa motibo cu e consideracionnan social-economico di Aruba ta diferente cu Hulanda y Merca.
Akinan tin mas media den un comunidad chikito cu ta gana poco y e costo di haci negoshi na Aruba tambe ta halto. "Nos ta desea pa ora nos sinta na mesa cu e organisacion aki (...) nos no ta obliga pa yega na un deal cu nan so. Pero nos ta bay na mesa cu e intencion pa yega na un deal cu ta husto pa e emisoranan, caminda cu nos por sigui sobrevivi", Aldrich Croes a expresa.
El a finalisa bisando cu Hits100 kier cumpli, pero kier sa tambe ken nan ta paga.
