E magia positivo di Evelyn Wever-Croes a bira un canto nacional 2025
*Betico Croes a logra su proposito pa entrega Pueblo animo continuo
*Union, canto, baile, a entrega Aruba atrobe su ingrediente principal
ORANJESTAD (AAN) — Algo sumamente grandi a pasa e siman aki na Aruba, cu durante ultimo lunanan, a cay den tension, preocupacion hasta negatividad sin por mira e luz cu for di 2017 a bira e forza pa Aruba haci cosnan grandi.
Durante ultimo añanan, Aruba a bolbe na e aurora di e pais Aruba, den cual e mentalidad di lucha, union nacional , optimismo a haci posibel pa dirigi pa Betico Croes, Aruba por a introduci e sistema di Status Aparte como su base legal nacional.
Pakico Betico Croes a bolbe entrega prueba di ta un Arubiano di alma y curazon, a bira visto den e hecho cu e no a scoge pa bay sinta na mesananmundial exclusivo, pero a dicidi pa un Himnpo y Bandera cu por a uni tur Arubiano na momentonan mas dificil di su historia.
Cu salida di Betico Croes, Aruba a experencia atrobe e mundo di crecemento den rikeza y sabiduria impone pa clase social y bukinan importante cu hopi bez esnan cu kier a manda, ni sikiera a comprende pa por a aplica loke nan a leza.
E spirito di animo y alegria humano di Betico Croes, a bolbe cu e entrada di Evelyn Wever-Croes cu mescos cu Betico Croes a bira lider cu no ta impone y bira “importante”pero lider stima, cu ta braza Pueblo pa hunto enfrenta tur adversidad.
Durante e epoca di gobernacion di Evelyn Wever-Croes sigur ta resalta e forma humilde y trankil cu e tabata confronta conflictonan cu ta presenta den tur famia, tur pais, henter mundo.
Pero cu habilidad, Evelyn Wever-Croes no tabata busca “corona di gobermamte”, pero mas bien ta bira e serviente humilde cu ta bay en busca di solucion hunto cu e Pueblo di cual e ta directamente parti integral y no un rey chikito sinta den un forti di poder.
Esaki a bini dilanti na 2025, cu despues di hopi aña, Aruba for di eleccion 2025, a bolbe cay den un situacion di separacion di color di partido, separacion di tur loke ta haci posibel pa sostene rabia, confrontacion, falta di armonia, cu ta kibra e positivismo y nacionalismo asina esencial pa Pais pa conoce alegria.
For di December 2024, un aire diferente a manifesta su mes na Aruba cu a mira un caida enorme den hasta huelga, discusion, problema durante e gobernacion di Evelyn Wever-Croes.
E positivismo di Evelyn Wever-Croes, cu tin e capacidad di Betico Croes pa pone Pueblo mira cosnan grandi pa e pais y no cana continuamente en busca di di material, posesion y posicion, tabata e magia di 2017 pa 2024 y a rementa dia 18 di maart 2025 ora Pueblo a celebra e dia nacional di Aruba.
Mas cu nunca Aruba a coy su bandera y cantando su himno a lanta para, uni den un totalidad di e herencia di e heroe nacional Betico Croes, cu no solamente a entrega Aruba Status Aparte, pero a entrega Aruba un pakete total di felicidad personal y comunitari, cu a culmina dia 18 di Maart 2025, ora porfin for di fin di 2024, Pueblo di Aruba por a grita, canta, baila, sin cansa, mainta, merdia y anochi, uni cu otro como familia Arubano uni pa su himno y bandera.
Evelyn Wever-Croes na momentonan sumamente importante pa Aruba, ta sigui entrega Aruba animo, hancra den e Himno y Bandera di Aruba Dushi Tera, cu politica barata y egoista ta kita for di Pueblo.
18 di Maart 2025 a bira un dia di hubilo nacional ora, na momentonan di falta di un rumbo fiho di gobernacion, Aruba a coy su bandera, a canta su himno, y a tene man pa sigui cana den e union Arubano, cu a bira e herencia di Betico Croes!
Di e forma aki, Aruba a bolbe subi e caminda cu a hiba na 1985, caminda por a trata na horta e logro y herencia cu Betico Croes a laga atras pa henter su pais, pero no a logra pasobra Aruba ta un pais, un familia cu ta sigui crece den amor, union y alegria capaz di kibra tur obstaculo y falsedad, pa alcansa su felicidad real!
