ORANJESTAD (AAN) – Genesis Maduro di HIAS Aruba, a expresa den conferencia di prensa, cu e fundacion aki ta hopi orguyoso di colabora cu diferente instancia local y internacional,
y e siguiente actividad ta bay tuma lugar entre dia 25 di November y 10 di December (observando e Dia Mundial pa Eliminacion di Violencia contra Mucha Muher y Muher Adulto), cu ta un art banner, unda pueblo di Aruba ta invita pa pone nan hand print riba dje.
Esaki ta manera un simbolo unda tur hende ta para na solidaridad contra violencia na hende muher adulto y mucha muher.
Personanan individual y instancianan cu kier pone nan man pa e causa aki, por yama na HIAS pa nan pasa y mustra cu nan tambe ta sostene e Dia pa elimina violencia contra hende muher adulto y mucha muher.
Di parti di Carolina Bedoya di United Nations High Commissioner for Refugees (UNHCR), el a splica cu nan tey pa aumenta e concientizacion durante e 16 dianan di activismo, unda e tema e aña aki ta “Uni na activismo pa pone un fin na “Violencia contra hende muher adulto y mucha muher”, y esaki ta un yamada na comunidad pa hisa nos voz y kibra e silencio contra hende muher y mucha muher.
El a menciona cu UAHCR tin un proyecto cu a cuminza diaranzon, ta sigui awe y mañan, cu yama “She is going” cu ta consisti di un actividad artistico cu lo tuma lugar den Cas di Cultura, unda un artista a recolecta prendanan di hende muher victima di feminicidio, rond mundo, y cu nan bida a wordo kita abruptamente. E ta un exposicion hopi impactante, y e idea ta pa henter comunidad ta envolvi den esaki pa kibra e situacion di violencia contra e ser femenino, y pa nan sa cu nan no ta nan so. E exposicion ta habri awe for di 10 or di mainta te 8’ or di anochi, Diabierna di 6 or di atardi te 8’or di anochi, y Diasabra di 9.30 pa 12 or di merdia.
Jeanine Tromp di CEDEHM, a menciona cu e aña aki nan tambe ta uni den e 16 dia di activismo, y manera e tema di e aña aki ta “Uni” nan a bin hunto y a logra esaki, cu locual nan ta hopi contento di por traha cu otro.
Pa dia 8 di December CEDEHM ta organizando un actividad y nan ta bay uza e tema “Violencia contra nos genero”. Dia 25 lo publica den prensa full un programa hinca den otro, pa concientiza nos pueblo eyfo tocante kico violencia contra hende muher adulto y mucha muher ta. El a invita pueblo di Aruba pa pasa na Cas di Cultura pa wak kico ta bay tin.
