Mundo ta prepara pa e impacto social y economico fuerte na 2024
*Culminacion Inteligencia Artificial den transferencia di capital
*Na 2020 uno den cada seis persona na Merca tabata riba 65 aña
ORANJESTAD(AAN)—Cambio, cambio y mas cambio. Esaki ta loke futuro tin prepara pa mundo, manera actualmente tur cifranan cu ta bira disponibel ta demostra.
Den historia, final di Segundo Guera Mundial na 1946 ta wordo considera como inicio di un temporada mundial nobo, cu na e momentonan aki ta culmina riba tur tereno.
Guera y mas guera ta kita atencion di hende, den e realidad cu mester pa visualisa futuro. Esaki ta loke e Fondo Monetario Internacional a trece dilanti, pero tambe loke e realidad mundial actual ta presenta na comunidadnan mundial y tambe na Aruba.
2024 lo entrega na hende, momentonan sumamente importante den cual e adelanto cientifico di hende lo ta motibo di cambio grandi pero tambe di asistencia enorme cu hende a desaroya pa su mes riba tereno cienitifico.
Pa prepara mundo pa e reto cu tin su dilanti for di 2024, Inteligencia Artificial, uzo di sistemanan cu entre otro ta asisti hende den compilacion di informacion, lo duna prueba atrobe di su importancia.
Cifra y mas cifra ta loke hende ta produci dilanti porta di e epoca, den cual e generacion di Baby Boomers, naci despues di e epoca di oro despues di Segundo Guera Mundial, lo entrega su herencia na e generacion nobo, cu por bira e generacion mas rico den historia a base di placa cu e lo tin pa drenta futuro.
Cifranan cu ta wordo compila y ahusta diariamente, ta mustra cu den e proximo decadanan un fortuna di mas cu 1000 Biyon Florin lo ta herencia di un generacion na otro.
Na momento cu e herencia di placa tuma lugar, e generacion nobo lo ricibi tambe como herencia uno di e responsabilidadnan mas grandi den historia, cu ta e forma cu e lo comparti e bienestar mundial cu e generacion cu ta despedi, pues e generacion di edad mad halto cu ta sigui subi na mundo.
E responsabilidad cu futuro imediato ya ta crea pa mundo, ta resultado di un Siglo den cual hende a cambia mundo riba tur tereno.
Paisnan nobo a mira luz despues di gueranan mundial pero tambe e procesonan di emancipacion rond mundo y den tur sector.
Exigencianan nobo pa condicionnan nobo di bida di e ser humano a wordo presenta, mientras cu ciencia a habri caminda pa hende alarga su bida. Den esaki e transplante di curazon na Kaapstad sigur ta central mescos cu e forma cu hende a conkista espacio como prueba di su habilidad cientifico.
2024 ta bira antesala pa 2025, ora e generacion cu a cambia mundo sigur lo ta den historia pa e forma cu awor nan ta bira responsabilidad como hende di mas edad, pa e mundo cu nan ta laga atras.
Millenials segun expectativanan lo bira e herederonan mas rico den historia humano cu traspaso di e herencianan mundial, pero tambe lo mester duna contenido na e cambionan grandi cu comunidadnan lo presenta.
E desaroyo di inteligencia artificial, cu ta haci posibel pa cifranan duna hende prueba di e trabou cu ta wordo spera y e pasonan cu mester tuma den futuro directo, lo hunga un papel sigur importante den revelacion di cifranan cu ta mustra kico e aumento considerabel di cuido pa e grandinan cu no por participa na e proceso laboral mas, lo exigi pa e grupo cu a entrega su herencia na un generacion nobo.
E gasto di cuido pa grandinan ta mes halto cu e exigencia di grandinan cu a crea e pakete moderno di necesidad humano den e progreso material di hende.
Con grandi e responsabilidad aki ta, a bini dilanti den cifranan cu awor ta den centro di atencion na por ehempel Merca, caminda e edad pro medio di hende, lo a bira 39 aña.
Esaki ta prueba di e aumento di edad di hende, pero tambe su necesidadnan cu mester wordo cubri pa e mundo material cu e generacion saliente a crea y cu awor ta parti di su exigencianan pa su bienestar pa un termino mas largo cu bida di hende a bira a base di adelanto cientifico.
Inteligencia Artificial lo mester yuda hende, pa duna contenido continuamente ahusta na realidad, na un edad mas halto cu hende lo alcanza pero conforme e condicionnan nobo di loke hende ta considera basico pa su bienestar.
2024 lo ta entrada pa 2025, cu semper DIARIO a presenta como e momento di cambio grandi pa hende cu salida di e generacion di Baby Boomers, e generacion cu a entrega hende retonan enorme na un mundo cu mester a wordo reforma despues di destruccion y den resultadonan di dos Guera Mundial, cu te awe realmente no a termina.
