*Pa Gerlien Croes haya tur e votonan cu AVP lo perde den eleccion 2024
ORANJESTAD (AAN) – Fraccion den Parlamento di Partido Movimento Electoral di Pueblo (MEP), tabata tin su conferencia di prensa Dialuna, den cual parlamentario Hendrik Tevreden a hiba palabra.
Tevreden a bisa cu ta bon pa analiza e situacionnan politico na Aruba, ya cu nan ta caba den campaña pa eleccion 2024, cu manera ta conoci ta dia 6 di December.
E parlamentario ta analizando e politiconan pero tambe e partidonan politico nobo cu a lanza nan mes y diadomingo, cu hopi entusiasmo, comunidad a pensa cu enberdad Aruba lo a conoce un partido politico nobo, sinembargo, ora di analiza henter e situacion a bin ripara cu ta mesun politica bieu conduci pa hendenan tras di cortina, cu ta buscando pa representa nan mes den algo cu nan yama “politica nobo”.
Tevreden a referi na Partido Futuro, cu Diadomingo cu a pasa a lanza su mes na Casibari. Tevreden a bisa cu ta nan derecho, pero tur hende sa cu esnan cu ta maneha e lugar ey ta famia Eman, procedentenan di Partido AVP. El a cuestiona cu di tanto lugar cu tin na Aruba, e lider di e partido a scoge precisamente un lugar cu ta liga na famia Eman, pa e lanza su partido Futuro.
“ E ora bo ta mira cu ta mas cla cu dia cla mes, cu Partido Futuro ta e satellite di Partido AVP cu lo bay purba di gara of haya tur e votonan nan ta bay perde den e eleccion aki, di 2024.
“ E lider di Partido Futuro, señora Gerlien Croes, a tarda mas di tres siman, casi un luna, prome cu el a tuma un decision pa por sali for di Partido AVP, compara cu e colega di dje cu ta señor Rycond Do Nascimento, cu a dicidi di biaha cu no ta participa den e fechorianan cu ta tumando lugar na Partido AVP y a distancia su mes despues di un partijraad”, Tevreden a bisa.
Segun Hendrik Tevreden ora a pensa cu Gerlien Croes a kibra lazo cu AVP, patras di cortina ta e partido aki ta guiando e proceso aki reiterando cu, p’asina Partido Futuro por coge e votonan cu AVP lo perde den e eleccion aki.
