ORANJESTAD (AAN): Si bo tin planea di bishita Canada, bo tin di bay vacuna bo mes contra Covid-19.
Tur hende cu kier bay bishita Canada pa proximo añanan, lo tin di ta vacuna. Esey ta loke Ministro di Salud di British Columbia, Adrian Dix a bisa durante un entrevista na TV.
Dialuna cu a pasa, pa prome biaha desde cu e pandemia a cuminza, cu Mericanonan por a drenta Canada bek pa viahe no-esencial. Pero ora di drenta Canada, bo tin di mustra prueba cu bo a wordo vacuna y tin un test negativo di Covid-19 di menos di 72 ora.
E provincia di British Columbia a bay di acuerdo pa habri frontera, pasobra e grado di vacunacion eynan ta 82% caba.
Esey ta e privilegio di ta vacuna, pues bo por cruza e frontera di Canada y Merca tur dos banda.
Di e forma aki, British Columbia ta trata di restaura y habri nan economia bek, pero alavez ta proteha salud publico. E industrianan na British Columbia ta hopi optimista cu e frontera a habri. Nan sa cu e bishitante Mericano ta representa 2/3 parti di negoshi internacional, pero pa awor nan ta spera cu lo por haya suficiente pa asina por cera 2021 cu bon cifra.
Aunke durante e pandemia, tabatin hopi turista Canades mes cu a dicidi na tuma nan vakantie bishitando otro parti di Canada. Pero awor cu e grado di vacunamento a subi na Canada y tambe na Merca, e ta yuda habri frontera y linea di movimento, y lo por yuda negoshinan bay bek riba pia.
Canada a impone varios medida estricto tambe pa su mesun ciudadano- y tambe bishitantenan. Por ehemplo hendenan cu ta vacuna so mag di bay mira wega deportivo, incluyendo Hockey y tambe Baseball. Y esey ta djis e realidad practico di e pais.
Pa e motibo ey, e grado di vacunacion na Canada ta hopi halto.
