Regla nobo di importacion na Union Europeo -ORANJESTAD (AAN): Ya caba for comienzo di luna di Juni, DIARIO a cuminza ricibi reclamo di algun cliente di Post Aruba NV,
ora cu nan a bay pa manda pakete pa nan yiunan na Hulanda, y a haya un sorpresa.
Tabatin un borchi indicando cu entrante 31 di Mei 2021, cu cierto productonan no por wordo manda mas den paki/caha pa famia of yiunan studiante na Hulanda.
E regla ta cu ora bo bay manda un paki/caha pa Hulanda, bo mester yega na Post Aruba NV cu e caha habri. Pa asina nan por check tur cos, kico por bay of no.
Tambe a bin cu regla tin di pisa cada producto apart. Esaki a laga varios hende sorprendi, pasobra bo ta paga pa e peso total toch di e caha pa stipula e tarifa cu tin di paga.
Loke nan a keda babuca cune, ta e regla cu bo mester tin prijs riba e productonan cu bo ta manda. Aki e reclamo di ciudadanonan ta cu na Supermarketnan grandi, e prijsnan no ta poni cu sticker riba e producto! E prijs ta poni riba e reki den e negoshi.
Entre otro ta conoci cu no por manda alcohol, pero awor a bin acerca e cuenta cu bo no por manda p.e. productonan pa desinfecta tampoco, e.o. ni Clorox ni Lysol Wipes. Ta asina ‘vlambaar’ e Wipes aki ta anto?
Tambe tabatin reclamo cu no por manda tampoco hairgel of hair oil, siendo cu semper ta manda esaki seya den un saco di plastico Ziplock y wanta hunto cu tape.
Nan tabata pidi pa Post Aruba NV publica den corant, ta kico por manda of no, y e motibo pakico cu Hulanda a cambia e regla.
HENTER UNION EUROPEO: E regla aki no ta uno cu ta Hulanda ta introduci. Segun Post Aruba NV, entrante awe 1 di juli 2021, Union Europeo ta implementa reglanan nobo di importacion pa tur producto cu ta bin for di paisnan cu ta pafor di e Union Europeo.
Antes, pakinan cu nan contentido tabata tin un balor bou di 22 Euro tabata haya excepcion y no mester a paga costo di importacion, pero e regla aki ta cambia riba 1 di juli y tur producto importa lo mester paga TAX y invoerrechten.
E cambio aki ta conta pa esnan cu ta bende producto cu clientenan den paisnan den UE y no pa persona nan cu ta manda producto pa famia of un conocir den UE.
Loke si ta worde premira, ta cu e cambio aki lo por bay crea tardansa den entregamento di tur tipo di paki den e paisnan di UE. Tuma bon nota di esaki!
Pa facilita e proceso y pa evita cu e persona den UE lo bay paga hopi mas innecesariamente mester jena tur informacion rekeri lo mihor posible riba e formulario cu ta worde uza pa manda e paki.
Post Aruba a pone extra informacion riba e reglanan nobo aki, y bo por haya esey na:
Ta importante pa tur hende cu ta manda pakete pa Hulanda, pa tene cuenta cu esaki.
