Parlamentario Jennifer Arends-Reyes:
ORANJESTAD (AAN)- Den cuadro di Dia Internacional di Hende Muhe su tema acelerando accion, Sra. Jennifer Arends-Reyes ta di opinion cu den tur sector tin espacio pa empodera, inspira y eleva nos hende muhenan mas. Tin trabou pa haci den, entre otro, participacion economico y oportunidad, educacion, salubridad, sobrevivencia y empoderamento. E tarea ta di nos comunidad henter pa yuda empodera nos hende muhenan door di brinda nan herment, educacion y confiansa pa tuma rienda di nan bida pa nan por progresa.
Aruba tin un populacion di adulto cu tin mas hende muhe cu hende homber segun ultimo rapport di estadistica. Y un grupo grandi di mama soltero cu yiu chikito, alabes ta traha full-time. Aruba ta pasando den tempo dificil y e decisionnan cu Pais Aruba tuma lo determina con nos comunidad ta surpasa e retonan pa cu, entre otro, educacion, salubridad y economia.
Trabou y educacion ta factornan sumamente importante pa e exito di cada hende muhe na Aruba y ta conta pa nan bienestar tambe. Aruba mester percura pa brinda apoyo na nos hende muhenan tambe por logra surpasa cualkier reto cu nan ta enfrenta. Costo di bida ta sumamente halto y e ta bira dificil pa famianan por keda cubri nan gastonan normal. Mester percura pa nos grandinan y famianan no cay den pobresa.
P’esey na momento cu hende muhe bay entrevista of solicita pa trabou, puntra con por yuda e persona na yega na e posicion door di brinda training; brinda e oportunidad pa emplea y paga hende muhe loke ta coresponde. Tambe mester percura pa brinda suficiente herment, training y oportunidad pa crece na trabou, mester percura pa un clima di trabou sano y cu ta inspira otro pa duna e miho di nan mes. Por ultimo, na Aruba tambe tin hopi caso di violencia relacional pa cual mester continua pone atencion pa trece conscientisacion riba e topico aki.
“E ta un tarea colectivo pa yuda nos hende muhenan na Aruba por vence retonan den bida. Deseando alabes tur nos hende muhenan hopi animo, forsa, bendicion y reconoce cu nos contribucion na Aruba ta valioso,” asina Sra. Arends-Reyes ta termina su mensahe bisando.
