ORANJESTAD (AAN) – Den entrevista cu docter Wilmer Salazar DIARIO a haya informacion hopi valioso y cu ta bon pa comunidad ta na haltura di dje, tocante e peligroso bacteria “Helicobacter Pylori”, cu por degenera den cancer na stoma.
- Ta berdad cu e bacteria HP ta coloniza/infecta ora un persona ta chikito y cu no ta duna sintomanan y cu ora ta infecta stoma (maag) ta duna sintomanan manera ta conoci?
“HP por infecta muchanan chikito, kiermen infancia ta e periodo critico di infeccion pa HP y mas di 50 % di muchanan bao di 10 aña tin’e. Dependiendo di e pais su grado di desaroyo, investigadornan ta mustra cu den paisnan desaroya HP ta presente den 1 -10% den mucha bao 5 aña di edad y den paisnan cu nivel di desaroyo mas abao tin 50% of mas di infeccion den e mesun grupo di edad. Nan ta asocia esaki cu e ambiente y condicionan higienico-sanitario y e contacto interfamiliar, entre otro.
Mayoria di esnan cu a keda infecta ta keda como portado asintomatico y lo por keda infecta pa bida largo. Kiermen cu un persona cu a haña HP ora tabata mucha, ainda den su edad adulto por tin e bacteria ey”.
- Cualnan ta e manifestacion clinico y evolucion di e malesa?
“E manifestacion clinico y evolucion di e malesa ta depende di factornan bacterial, di e persona mes y medio ambiente, dieta, estilo di bida, etc.
En resumen nos por bisa lo siguiente:
- 80% di esnan cu a haya HP su comportacion ta asintomatico.
- 20% ta presenta sintomanan: di esaki tin un 15 – 18 % cu por desaroya ulcera na stoma, un 2-3% cancer gastrico y y 1% linfoma MALT na stoma”.
- Tin doctor cu ta bisa cu tin indicacion cu un hende por nace cu e bacteria HP?. Por ta herencia of genetico?
“ E Infeccion HP no ta hereditario of genetico. Loke ta sosode ta cu e muchanan cu nan mayornan ta infecta cu HP tin un riesgo mas grandi di keda infecta door di e bacteria aki, loke ta wordo llama infeccion intrafamiliar.
E origen etnico a wordo apunta como un factor di riesgo, pero ta mas probable cu ta fuertemente relaciona cu e situacion socio-economico of e practicanan cu por aumenta e riesgo di transmission en bes di tene un base genetic”.
Con e infeccion pa HP ta manifesta su mes? Cual ta e sintomanan?
“ E sintomanan no ta exclusivo di HP, lo por tin algun otro condicion di salud cu docter mester valora, pa descarta si ta trata di un infeccion pa HP of algun otro malesanan cu ta causando molester di stoma. Esaki por ta algun di e sintomanan cu un persona por presenta:
- Dolor of kimamento di estoma, cu ta alivia ora ta come of tuma un antiacid
- Respo
- Perdida di apetito
- Nausea y/of sacamento
- Sacamento cu sanger (ulcera di stoma habri )
- Bahamento di peso
- Sensacion di estoma yen of hincha
- Af lo por tin colo preto (sanger den stoma of duodeno cu a baha pa tripa)
- Cansancio/debilidad”
- Con ta diagnostica infeccion HP?
Prueba invasivo:
“ Ta wordo uza endoscopio, pa check visualmente con e condicion di stoma ta, y tuma un biopsy (histopatology) pa detecta bacteria HP, kweek (clasificacion genotipico); Diagnostico microbiologico, monitoreo resistencia (antibioticos) y rapid test di Urea.
No invasivo:
- A) Serologia: Anticurpa IgG contra HP ( ta duna un stimacion di infeccion)
- B) Test aliento Urea: ta detecta isotopo no radiactivo di Carbono (C13) cu ta elimina via pulmon den forma di CO2
- C) Antigen Fecal Test: detecta HP den e af (pupu).
Kiko ta e tratamento contra HP?
Esaki ta e recomendacionnan pa evalua y trata Helicobacter pylori, di acuerdo cu e rapport di e IV Consensus di Maastricht y e guia di maneho di e American College of Gastroenterology (ACG) ta wordo recomenda:
-Mester tene na cuenta, cu a base di saminacion medico, antecedente personal y familiar, testnan diagnostic pa HP, doctor ta diagnostica si ta trata di un infeccion pa HP, y ta duna un combinacion di antibioticonan contra HP pa 10 – 14 dianan , dieta di proteccion gastrico y monitor.
