"Cada escenario, cada alerta, ta diferente"
ORANJESTAD (AAN) — Den entrevista cu señor Rino Hermans, Hefe di Bureau Rampenbestrijding Aruba (BRA), el a elabora tocante con e sistema a desaroya su mes causando awacero na Aruba, pero sin cu mester a cera scol.
Hermans a splica cu cuater dia pasa BRA tabata monitor un sistema cu tabata tin e potencial di desaroya den un depresion tropical of storm.
Pero e momento ey tabata pafo di Trinidad y Barbados “threshold” pa wak ora e drenta Caribe mes, kico e ta bay haci y ki curso e ta bay tuma.
A base di esey BRA a pone tur instancia concerni al tanto, y manera el a pasa Trinidad y Tobago y el a cuminza habri for di otro, tabata tin elementonan cu a strobe di desaroya y bira un depresion tropical of storm.
“Na e momento ey nos a keda monitor y a prepara si en caso e sigui desaroya pa ora e yega Bonaire, Aruba tabata prepara pa atende cu esey. Pero el a bin cu awacero y nos a predetermina anochi 8 or, cu e ultimo update, cu nos lo bay haya nubianan den madruga, pero te cu maximo di 35 milimeter, y desde e momento ey nos a bisa cu no ta necesario pa cera scol ni cancela eventonan di fin di siman”, Rino Hermans a señala.
El a agrega cu esaki pasobra pa 8 or di mainta e nubia lo a pasa Aruba voorbij. Esaki no ta nifica cu e desaroyo di e sistema y e depresion tropical a bira e # 9.
El a sigui splica cu nan mester distingui ki ora e awa mas pisa lo a pasa na Aruba, y tabata predetermina cu e lo a pasa entre 2.30 or di marduga te cu 5.30 or di mainta, y pesey no a cera scol, pero cu e trafico di Aruba lo tin molester cu e lugarnan custumbra cu ta bay bao di awa. Tambe BRA a determina cu cuater ora despues e sistema natural lo a hibe bek na lama, y por a experiencia cu pa 8.15 ami e solo a cuminza sali y aworaki mester tin un tiki pasenshi pa e awa bay bek na lama.
“Nos tin hopi sistema pa duna nos conseho. Anto basa riba esey nos ta duna un conseho. Nos no ta maneha Aruba riba nos emocion of pensamento, n nos ta manehe basa riba data, y atrobe nos ta determina cu e data cu nos ta uza, e sistema cu nos ta uza, ta duna nos casi précis kico ta sosode”, Rino Hermans a subraya.
Esey no ta nifica, Sr. Hermans ta agrega, cu aki un par di dia Aruba no ta bay tin mal tempo y lo cera scol y habrie 10 or di mainta. Di con? Pasobra si BRA ta ripara cu e parti mas pisa di e awacero lo ta entre 6 or cu 9’or di mainta bo ta prefera di tin tur mucha y tur mayor safe na cas, y bisa cu scol ta habri 10 or.
Hermans a subraya cu cada escenario, cada alerta, ta diferente. Depende ora e parti mas pisa ta afecta Aruba, esey ta e momento cu BRA ta bisa pa wanta tur scol of tur departamento cera, te cu e peliger pasa.
BRA su tarea principal ta pa scapa bida di hende y Aruba su infrastructura, Rino Hermans a remarca.
