Segun Diego de Cuba:
*Sindicato na Aeropuerto ta keda pa basta largo!
ORANJESTAD (AAN) – Presidente di Sindicato di Trahadornan di Aruba (STA), Diego de Cuba, den entrevista cu Matutino DIARIO a duna di conoce cu, e actual Hefe di Recursonan Humano di Triple-A a priminti cu na 2026, lo no tin sindicato mas na Aeropuerto.
“A well, mi tin bon noticia p’e. Pasobra e sindicato ta bay ta na Aeropuerto pa basta largo. Y mi tin cu bisa tambe cu nos a sinti cu tin otro sindicato ta bruha tera mahos aki riba, anto mi ta kere cu, cu e logro di Diabierna, tur hende por wak cu STA ta e sindicato cu semper ta sali na vanguardia, cu semper ta logra cosnan bon, pa e trahadornan di Aeropuerto”, Diego de Cuba a manifesta.
E lider sindical a expresa cu locual e actual hefe di HR di Aeropuerto a haci tal declaracion, el a pensa cu e persona aki no por ta mucho bon na su tino. “Pakico bo kier a elimina un sindicato cu semper a existi na Aeropuerto? STA ta e sindicato cu a negocia e prome Contrato Colectivo pa Triple A, y cu tiki tiki a crece y aworaki tin un tremendo CAO. Pero e no a cay di cielo; ta den transcurso di aña a keda supera pa na final e keda un bon producto. Esnan cu aworaki a cuminza traha den Triple A-NV, nan no sa kico ta e caminda largo cu a wordo encamina, pa yega akinan”, Diego de Cuba a remarca.
De Cuba a reitera cu STA ta contento cu e decisionnan tuma pa e Director Fazio, y e dos logronan cu a alcanza, y cu nan a concorda cu lo sigui cu e otro puntonan cu falta pa trata, dia 24 di September awo pa 8 or di mainta. “Triple-A a cumpli, e contra partido a cumpli y nan a atende cu nos, y nos a logra loke mi ta kere e trahadornan merece, y nos di Sindicato STA ta hopi contento cu e resultado di e reunion di awe, y nos kier a gradici James Fazio pa su comprension tambe, y nos ta aprecia e tempo cu el a pone p’atende e reunion aki”, Diego de Cuba a reitera.
