Directie Natuur en Milieu:
ORANJESTAD (AAN): E American Flamingo ta un di e flamingonan di mas grandi. Tambe e ta conoci bou di e nomber Caribbean Flamingo y na Aruba nos ta yam’e Flamingo. E nomber na Latin pa e flamingo ta Phoenicopterus y e di dos parti di e nomber na latin ta ruber, cu ta nifica e color cora.
E flamingo aki ta famia di e parhanan cu pia largo y di ecosistema semi-acuatico di awa salo. E ta reconoci pa su plumashi ros of color mamaya, pia y nek largo. Ta haya e sorto di parha aki den Sur America, West Indies y tambe den areanan topical y subtropical di Noord Amerika.
E Flamingonan ta prefera di biba den saliña, lagun, area cubri cu lodo, area cu awa brak of den lagunnan pega cu costa of esunnan mas paden di un pais.
Aunke ta bisa cu e flamingonan ta nativo di e parti tropical di Sur America, toch por haya nan den otro estadonan di Merca, pa via cu nan ta huy di horcan of mal tempo. Pero nan ta bolbe bek na nan luga di origen. Tin biaha uno por desorienta y desvia di e grupo di flamingo cu ta trek bay hunto.
Flamingo por midi entre 120 pa 145 centimeter halto. E macho ta pisa averahe 2.8 y e hembra 2.2 kilo. Mayoria di e plumashi ta ros y ora e ta adulto e ta bira ros cla. E halanan ta casi cora. E prome cu e di dos rij di pluma, ora di bula por wak e, ta preto. E piek ta ros cu blanco cu un punta preto. Su pianan ta completamente ros. E yamada ta uno manera un grito di patonan.
E pareha flamingo ta haci mayoria cos hunto; para, drumi y come hunto of den cercania di otro. Mayoria pareha flamingo ta monogamo pero tin excepcion di trio y cuartetonan. Tin hopi etica compleho di comportacion entre e variacion di relacion.
E flamingo ta pone un solo webo blanco cu ta sinti manera krijt of calki. E ta pone e webo riba un sero chikito di lodo. E webo tin un incubacion entre 28 pa 32 dia. Tur dos parha, e hembra y e macho ta yuda cu esaki. E parha ta bira adulto entre 3 pa 6 aña. Nan por biba 40 aña y ta un di e parhanan cu ta biba mas largo.
E pianan largo y patanan cu ta conecta e dedenan ta yuda pa coba den e lodo pa asina cuminda bin ariba superficie. E flamingo su piek ta special pa filtra e cuminda di diferente tamaño for di e awa of lodo. Nan ta come insecto, bichi, larva, slak, pisca of cocolishi chikito, yerba, alga y cabaron. Nan ta haya nan nutrientenan for di micro-organismonan den e lodo. Si cuminda caba unda nan ta, nan ta bula bay otro parti pa come y bolbe.
Menasa pa e flamingonan ta keda hende cu ta stroba e bestianan of duna nan cuminda inadecua. Mal tempo, subida di nivel di awa y inundacion ta limita e cantidad di cuminda pa flamingonan. Hopi luga ta uza flamingonan como simbolo pa mercadeo.
