Kico e cambio desde 1 di mei 2025 ta nifica?
ORANJESTAD (AAN): Recientemente (1 di mei 2025) Gobierno di Aruba y Organo Ehecutivo AZV a anuncia un adaptacion den e lista di remedi di AZV. Manera ya tabata conoci, e pandemia di Covid-19 tabata tin su efecto riba nos economia cu consecuencia cu AZV mester a baha e gasto cu 60 miyon. Esaki a haci cu AZV mester a reduci e cantidad di remedi cu tabata wordo cubri.
Un di e cambionan mas principal tabata tin di haber directamente cu e adaptacion di Ley AZV tocante remedi, proclama 1 di juli 2022 y cu a bay na vigor 1 di october 2022.
E cambio principal tabata cu e asegurado ya no tabata tin derecho mas riba e remedinan conoci como “OTC” (Over The Counter), esta e categoria di remedi pa cuido propio y cu por wordo cumpra sin receta di dokter. Adicionalmente tabata tin un otro categoria di remedi cu a sali for di e lista positivo.
Na e momento aki AZV a haci un excepcion cu ta cubri nan solamente ora tin cierto indicacion medico of pa uzo pa malesa cronico. Awor casi 5 aña despues di e pandemia Covid-19 y cu un bon recuperacion di e economia, tin tur oportunidad pa AZV duna bek na su aseguradonan.
Kico e cambio desde 1 di mei 2025 ta nifica?
E adaptacion di e lista di remedi ta nifica cu aproximadamente 129 remedi a bay bek riba e lista. Contrario na e situacion anterior, unda cu AZV tabata paga esakinan solamente pa un grupo di asegurado, esta e grupo di asegurado cu tin malesa cronico, awor ta disponibel bek pa tur asegurado di AZV. Esey ta nifica cu hasta pa un malesa di duracion corto, bo lo haya bo remedi.
Pa duna algun ehempel di loke AZV ta cubri bek:
- Remedi contra alergia; e genericonan di Claritine, Zyrtec, Allegra of Promethazine.
- Remedi contra dolor di stoma; Losec, Pantoprazole, Famotidine, etc.
- Remedi contra dolor manera Cataflam, Voltaren, Celebrex, Ibuprofen, etc.
- Remedi contra secamento di wowo, natural tears, etc.
- Remedi contra diarea y sacamento; Motilium, Primperan, Imodium, Bisacodyl, etc.
- Remedi pa yuda sistema digestivo; Metamucil, Duphalac, etc. ➢ Remedi contra eczema of “rash” manera Nizoral of Dermovate.
Pues…e asegurado por bay trankil botica ya cu AZV ta cubri e remedinan aki sin ningun tipo di restriccion. Tene cuenta cu “OTC” (remedi pa cuido propio)
Tur asegurado mester tene cuenta cu e categoria di remedi “OTC” (Over The Counter), esta remedinan pa cuido propio no ta cay den e cobertura di AZV. Nan ta remedi pa cual bo no tin mester di receta y no tin cu bay niun dokter di cas (ni specialista!) pa haya nan. Bo ta cumpra e remedinan aki directamente na botica.
