Herrick Henriquez, Director di ATA:
ORANJESTAD (AAN) Den entrevista cu Herrick Henriquez, Director di Asociacion di Comercio y Industria di Aruba (ATIA), el a comenta cu e reto mas grandi cu e Asociacion ta mira, esta pa logra obtene empleadonan.
“Nos tin lunanan caba papiando over di dje. A bin un instruccion di maneho di Minister, unda cu pa cierto rekisitonan, personanan por haya permiso mas facil. Nos ta bay drenta den un temporada halto atrobe, pues e luna di October aki e luna halto di turismo ta cuminza, pues e reto cu nos ta wak eynan ta pa DIMAS traha riba e peticionnan mas lihe posible, pa por haya hendenan pa traha. E maneho ta pa e hendenan cu ta na Aruba caba, pa regulariza nan. Hasta Hulandesnan cu tey caba. E sugerencianan cu nos a haci den pasado tabata pa uza hendenan mas posible na Aruba cu tey caba, cu ta trahando caba, of cu lo kier traha”, Henriquez a indica.
El a agrega cu ideanan a bin dilanti tambe pa studiantenan pa laga nan traha part time na Horeca, por ehemplo. Pues, cosnan asina cu den Labor nos ta wak como un hecho. E instruccion di maneho mester wordo actualiza pa e afecta tur sector, y e tin palabra di hotel den dje. Pues, DIMAS ta bezig ta wak e parti ey. Sector di hotel so ta hayando e preferencia awo. E ta algo cu nos a trece dilanti siman pasa cu minister. Minister a bisa nos cu nan ta trahando riba e update, pa afecta tur comercio”, Herrick Henriquez a comenta.
El a agrega cu ATIA ta hayando yamada di su miembronan, vooral di sector di Horeca y sector di construccion, cu e sa tin proyectonan cu nan mester di hende, y otro sectornan di servicio cu mester di hende pero gewoon, no ta haya afspraak of hende pa atende cu nan. Pues, esey ta algo cu nos ta puntra DIMAS pa traha riba esaki” director di ATIA, Herrick Henriquez a señala.
