Resumen di un investigacion Universitario
ORANJESTAD (AAN): Riba e repositorio di Universidad di Aruba, nan ta publica resumen di articulonan di nan investigadornan.
Un ehempel ta e articulo skirbi door Miranda Gielen di Universidad di Aruba tocante 'Haciendo husticia na pasado: Rectificacion herencia di “nombernan di catibo' (Na Hulandes: Recht doen aan het verleden: de erfenis van ‘slavennamen’ rechtzetten).
Aki DIARIO ta presenta resumen di e investigacion aki di Miranda Gielen y Ruben Ritsema. Esnan cu kier lesa e articulo completo, por haci esey na e website aki:
Siguiendo e disculpa di Hulanda pa rol Hulandes den e historia di sclavitud na aña 2022, y
subsecuentemente e disculpa di Rey riba prome di juli 2023, ta posibel pa temporalmente, cuminsando
prome di juli 2024, cambia fam (nomber di famia, “geslachtsnaam”) relaciona cu sclavitud sin gasto na
Hulanda Europeo.
Despues di e abolicion di sclavitud na aña 1863 hendenan libera no tabata permiti pa
scoge nan propio nomber: esaki tabata asigna pa nan shon. Descendientenan di e hendenan libera ainda
ta carga e nombernan aki, un recuerdo duradero di e pasado di sclavitud colonial. E amienda di ‘besluit
geslachtsnaamwijziging’ ta hacie temporalmente mas facil pa cambia e nomber fam. E aplicante mester
declara unicamente cu e ta un descendiente directo di un hende sclavisa. Ademas, no tin gasto mara na
e cambio di nomber den e prome cinco añanan di e areglo aki danki na e suma reserva pa e reglamento
di € 14,9 miyon di ‘slavernijverledenfonds’.
Ta e intencion cu e cambio di fam lo conta tambe pa Bonaire, St. Eustatius y Saba (e islanan BES),
pasobra e islanan aki ta forma parti di Hulanda (municipionan special). Sinembargo, e cambio aki lo
drenta na vigor mas laat (ta spera januari 2025). Pa Aruba, Curaçao y Sint Maarten no tin ningun plan
ainda pa añadi e base adicional pa cambio di fam na e reglamentonan local.
Como cu no tin proposicionnan di cambio pa añadi e motibo adicional aki pa cambio di nomber pa
descendientenan di hendenan sclavisa na Aruba, Curaçao of Sint Maarten, e cambio lo crea relacion
straño entre e miembronan di e famianan bibando na e diferente paisnan dentro di Reino. Hopi famia di
hende sclavisa ta biba na diferente pais den Reino y den Caribe, resultado directo di e comercio di catibo
of di mobilidad creciente den e mundo moderno. Diferencia den ley di nomber den Reino tampoco no ta
cuadra cu e obhetivo di Statuto di Reino, cu ta considera Reino como un solo hurisdiccion. Na interes di
igualdad y husticia den di henter Reino, e reglamento nobo mester por ta aplicabel pa tur ciudadano di
Reino, incluyendo Aruba, Curaçao y Sint Maarten.
Pasobra e historia di sclavitud ta un pasado comparti di tur pais den Reino, e autornan ta haci un
yamada na gobiernonan di Aruba, Curaçao y Sint Maarten pa pone e mesun cambionan gratuitamente
na disposicion di nan residentenan. Ademas, e autornan kier mira cu e cambio di fam pa e
descendientenan di e hendenan sclavisa ta keda disponibel gratuitamente pa mas cu cinco aña.
Aparte di esey, nan ta referi na e obligacion di e cuerpo gubernamental pa duna esnan concerni mas
informacion tocante e gastonan adicional y directamente relaciona cu e cambio di fam. Pasobra
esakinan no ta reimbolsabel, manera e gastonan relaciona cu ahustamento di documento di
identidad y otro documento oficial.
