Tur dia un mucha ta siña cosnan nobo. Y no ta solamente na scol nan ta siña e cosnan nobo aki, na cas tambe! Por ehempel:
Si e yudabo traha cuki, e ta siña con pa midi, con pa mezcla, y con pa kibra un webo. Si bo tin un cura cu hopi mata, e por observa diferente bestia manera parha, barbulet, insectonan. Tin diferente manera con abo como mayor por percura pa e momentonan pa siña cos nobo na cas pasa mas regular. Aki ta sigui algun idea:
- Naturalesa: traha un cas di fruminga
Esaki ta duna bo famia oportunidad pa observa e fruminganan di cerca y wak con duro nan ta traha pa
coba tunnel y yega na nan cuminda. Pone un baki chikito di plastic den uno mas grandi (p.e. un baki di 1 quart den un baki di 2 gallon). Yena e espacio mei mei di e dos bakinan cu tera te na e rand ariba. Muha un spons y pon’e den e baki mas chikito. Pone un tiki stropi den e baki mas chikito. For di den e tera bo ta colga algun hilo of cabuya fini na un manera cu nan ta cay te abou den e baki mas chikito. Asina e fruminganan por yega na e cuminda y awa. Awor mester busca algun fruminga: pone un tiki stropi riba un pida papel y pon’e abou caminda bo ta mira hopi fruminga.
Asina cu un grupo di fruminga subi riba e papel bo ta pone e papel cu fruminga ariba den e baki. Tapa e baki cu plastic wrap of waxpaper y traha algun buraco chikito aden. Want’e cu un elastiek. Tapa henter bo baki di plastic cu papel preto pa e cas di fruminga keda scur. Wanta esaki tambe cu elastiek. Despues di un par di dia bo ta kita e papel cu e fruminganan tabata ariba y lo bo mira e comienso di un “network” yen di tunnel cu nan a traha. Agrega mas stropi y awa si mester. Corda laga e fruminganan liber ora boso caba cu e observacion.
- Den pura: snack di matematica
Muchanan ta corda un les mas mihor si nan por sinti y purba: corta bo yiu su fruta favorito den mitar of
den tres pida, cuater pida, ocho pida of, si por, den dies seis pida. Duna bo yiu un (1) pida y lag’e rei si ta
un cuart e ta comiendo of kico e ta. Asina bo ta repasa tur e tamañonan.
- Resolve problema: haci preguntanan interesante
Bo por usa un borchi chikito of un papel grandi y colg’e den cushina. Scirbi cada tanto dia un pregunta.
Por ehempel: “Cua blachi di mata tin e forma aki?” y pinta e blachi banda di bo pregunta of “Cuanto cero
un bilion tin?”. Bo por duna premio chikito pa e contesta corecto. Bo por haci uzo di diferente website pa haya mas idea di preguntanan pa trivia.
- Den pura: stimula e sentidonan
Bo yiu ta pidi bo atencion net ora bo ta cushinando? Puntr’e pa cera su wowonan y lag’e identifica
diferente specerij door di hole nan. Bo por cuminsa cu cosnan mas familiar, manera siboyo y conoflo.
Despues bo por sigui cu cinnamon, ginger, menta, etc. No usa peper!
- Creatividad: traha un caha di idea
Hopi biaha muchanan tin yen idea tremendo y nan no sa kico pa haci cu nan. Traha un caha di idea cu un
buraco manera di spaarpot. Den e caha tur miembro di famia por tira nan ideanan cu nan a scibi riba papel. Bo por chek e caha tur dia y si bo haya algo aden bo por reacciona masha entusiasma. Asina bo ta laga bo yiunan sa cuanto bo ta balora pensamentonan creativo. Un caha di idea ta laga miembronan di famia pensa riba diferente topico: cua cuminda pa cushina, kico pa haci durante vakantie, unda pa bay
diadomingo, con pa soluciona un problema of malcontento den famia y asina hopi mas. Por habri e caha tambe un biaha pa siman durante un ‘reunion di famia’. Tur miembro di famia ta sinta hunto pa repasa tur idea.
- Den pura: hunga dictionario
Un miembro di famia (hungador no.1) ta repasa un dictionario y ta lesa duro diferente palabra straño cu
niun hende no conoce. E ta scoge un di nan, ta mencion’e duro y ta scirbi e nificacion riba papel. Niun
hende no mag wak. Mientras cu e ta scirbiendo e otro miembronan di famia ta scirbi nificacionnan straño
di e palabra, nificacionnan cu ta zona manera berdad. Hungador no. 1 ta colecta tur e definicionan y ta
lesa tur duro, incluyendo esun di su mes cu ta esun corecto. E otro hungadornan mester rei cua definicion
ta bon. Naturalmente esun cu a rei bon ta e ganador.
Por haya e wega aki den un forma di un wega di mesa tambe: Balderdash of Balderdash Junior (cu ta mas pa muchanan)
- Geografia: perspectiva global
Lanta interes di bo yiunan den geografia door di pone un globo of colga un mapa di mundo na un lugar
central den bo cas. E muchanan lo familiarisa cu paisnan y ciudadnan di rond mundo y semper nan lo por
mustra di unda algo ta bin. Ora di haci compras, por laga nan chek riba e label di unda e sardinchi of azeta of otro comestibel ta bin y laga nan busc’e riba e globo of mapa.
- Den pura: traha frasenan pret
Hasta mucha cu ta kere cu nan no ta gusta scirbi lo gusta e wega di palabra aki. Duna tur hende un sker,
papel sin liña, un stick di lijm y algun pagina di corant. Nan tin cu corta palabra y/of frasenan cu nan ta
mira den e titularnan di articulonan y traha frase pret cu e pidanan cu nan a corta. Mas straño y pret, mas
mihor! Ora caba cada miembro di famia por lesa e frasenan cu el a traha duro pa e otronan tende.
E articulo aki ta saca y adapta for di e revista “Family Fun”.
Pa informacion of pregunta por acerca Fundacion Pa Nos Muchanan - Cumana 2.
