ORANJESTAD (AAN): Guizza Maria Steenvoorde, actual Miss Teen Universe International 2025,
eligi den representacion di Aruba, ta cla pa subi riba tarima di Art Fashion pa prome biaha den un rol diferente: como diseñadora aspirante. Den un colaboracion inspira cu e diseñador renombra di Aruba, Andrew Steba, Guizza Maria ta trece su diseño, cu no solamente ta moda, sino ta un mensahe profundo.
E edicion di 2025 di Art Fashion tin un tema poderoso: Husticia.
Guizza Maria a eligi pa duna bida na un acto titula “Justice for the Child”, un presentacion carga di emocion y pasion. E ta bay uza un poema cu su mes a skirbi, cu lo bira un show completo di palabra y moda.
Den un coreografía inolvidabel, Guizza lo subi tarima hunto cu seis celebridad hoben di Aruba: Elise Heronimo, Alina Wever, Savanah de Lisle, Shanedy Croes, Carolyn Kock y Christalyne Kock.
Hunto, nan lo trece atencion na un di e temanan vital: E derecho di tur mucha riba mundo. Den e show aki, moda ta bira voz, caminata ta bira protesta, y poesia ta bira un grito pa HUSTICIA. “BO NO TA BO SO”.
“Cada mucha merece proteccion, amor y respet. A traves di e show aki, mi deseo ta pa laga tur hende sinti cu nos ta tin un RESPONSABILIDAD pa yuda crea un mundo mas husto pa nan,” Guizza Maria a agrega, hopi emociona. "Mi kier mustra cu mi reinado no ta un corona, e ta cada ocashon cu mi por laga cada mucha sinti cu nan balor ta insuperable”.
Art Fashion 2025 ta priminti pa keda den memoria como un evento cu ta bay mas aya di pasarela – un experiencia di arte, inspiracion y lucha pa husticia.
Guizza ta invita comunidad pa ta presente den e momento unico aki, riba diaranson 3 di september, pa uni y laga cada mucha sa cu nan no ta nan so.
