ORANJESTAD (AAN) – Fundacion “Fiestas Patrias, Peruanos en Aruba” a reuni cu Formador Wever-Croes, den cuadro di formacion di Gobierno.
Señor Guillermo Salinas, presidente di e fundacion, a hiba palabra den e conferencia di prensa cu a sigui na e reunion, pa duna su impresion encuanto e encuentro aki.
Señor Salinas a expresa palabranan di gradicimento cu e fundacion a wordo teni na cuenta den e reunion aki, unda nan por a trece dilanti nan inkietudnan como un comunidad organiza, manera e comunidad peruano ta.
Salinas a bisa cu na e momentonan aki, e ta Presidi e fundacion “Fiestas Patrias, Peruanos en Aruba” cua wordo lanta na aña 2016.
“Nos tin cierto inkietudnan cu nos a laga yega cerca Prome Minister y su ekipo, cu ta e asunto di e permisonan y su renovacionnan, cu nos tur conoce. Ademas e renovacion di e passportnan cu ta loke mas ta interesa e fundacion, pasobra nan mester tin nan passport vigente, regularmente, pa por aplica pa peticion di permiso. Tambe nos tin e preocupacion cu pa motibo di e pandemia, e mayornan no por reuni e 2040 florin mensual como rekisito pa renova e permiso di e muchanan. Y esaki ta trece un poco di retraso pa regla nan estadia” Salinas a menciona.
Tambe tin e inkietud di e residentenan Peruano di 50 aña cu a keda sin empleo, pa wak di ki manera e gobierno lo por colabora of crea algun tipo di trabao pa nan, of duna nan un adelanto di nan pension te cu nan mes por cobra, of haya un trabao stabil cu automaticamente e adelanto di pension por stop, pa nan ricibi nan pension na su 65 of 67 aña.
Otro punto cu el a menciona ta e problema di reubicacion di famia. “Mi ta bise pa experiencia propio. No ta facil emigra cu e mayornan ta emigra y e yiunan ta keda na otro lugar, pa busca horizontenan nobo. Esaki tambe nos a duna di conoce, pa evita cu esaki sosode dentro di e comunidad di Aruba”, Guillermo Salinas a señala.
El a agrega cu tambe e residentenan Peruano ta gradici door di tur e ayudo cu gobierno a proporciona nan, durante e pandemia. Esaki ta un tempo bastante duro na mundo.
“Realmente mi a keda hopi reconforta pa tur loke nos por a combersa”, Guillermo Salinas a subraya.
El a comenta cu desde aña 1950 cu ciudadanonan Peruano a cuminza bin Aruba, te aworaki tin 1200 persona residente. Ya casi no tin Peruano cu ta emigra pa Aruba, masha poco di nan ta sali di nan pais, por ta un diez persona pa aña of menos.
El a comenta cu residentenan di Aruba, di edad grandi, kier bolbe na nan pais, pero nan kier regla prome nan beneficio di pension pa nan bay Peru cerca nan famia, debi cu e pension ta hopi abao y nan no por keda mantene nan so na Aruba.
