ORANJESTAD (AAN): Tabata Diadomingo ora cu Guardacosta di Caribe Hulandes tabatin un unidad ta coriendo rond vigilando costa zuid di e isla, e personal abordo di e speedboat special Metal Shark a nota algo inusual den area di Spaans Lagoen.
Nan a nota cu tin un boto ta drief, y cu tin hende abordo.
Mesora e driver di e Metal Shark a mobiliza pa e boto. Nan a yega y a bin nota cu tin cuatro hende abordo di e boto ‘Estephanie’ cu ta djis sigui drief.
E Capitan di e boto a divulga cu su motornan diripiente a stop di funciona, pues e no tin forma pa yega bek na tera. Personal di Guardacosta a nota cu tur cuatro hende ta bon di salud y no mester di asistencia di emergencia.
Nan a ofrece pa lastra e boto bek pa tera, y esey a wordo aprecia. Aki por mira momento cu ta lastrando Estephanie bek pa tera, y nan a bay mara bek na e conocido lugar di Rancho di Nel.
