ORANJESTAD: (AAN): Recientemente Milton Ponson di Rainbow Warriors International Core Foundation
a anuncia cu e organizacion ta preparando pa den e proximo 6 lunanan lanza un Agencia Internacional di Prensa pa Aruba.
E intencion ta pa e agencia trece informacion dilanti den varios idioma, destina pa comunidad internacional.
Durante un conferencia di prensa Ponson a splica entre otro cu Rainbow Warriors hunto cu varios otro NGO lo crea e agencia cu ta bay tin e nomber, ‘Smart City Aruba’.
Smart City lo trata diferente tema, incluyendo:
- Business, Business Opportunities and International Trade in Aruba.
- Science, Technology, Engineering, Mathematics, and Innovation in Aruba.
- Culture, Events, and Entertainment.
- International Relations with European Union and Kingdom of Netherlands.
- Social Issues, Demographics, and Human Interest Stories.
Ponson a bisa tambe cu motibo pakico ta bin cu e iniciativa aki, pasobra den pasado tanto di parti di Gobierno como tambe di sector priva tabata tin intentonan pa difundi informacion cu no tabata cubri directamente e tema di turismo.
“Pa loke ta e efecto y impacto di esaki, el a keda minimo pasobra e estudio cu a wordo haci riba con pa ‘set’ esaki up, nunca tabata bon estableci”, segun Ponson.
El a sigui bisa cu actualmente tin un grupo di NGO’s y un grupo individual cu a dicidi cu mester yena e bashi aki, pasobra nos economia tin cu diversifica.
“Hopi placa, tanto den Gobierno anterior y den Gobierno actual, a wordo hinca den innovacion y diversificacion di economia unda cu a saca e mensahe cu Aruba ta mas cu solamente un destino turistico, pero esaki no ta logrando”, segun Ponson, kende a sigui bisa cu un grupo di individuo y NGO’s colaborando hunto y despues di a consulta cu ‘media consultants’ na Europa y Merca, a dicidi di bin cu e agencia aki di prensa.
El a splica cu ta evaluando tambe pa crea revista y corantnan digital pa distribui informacion gratis internacionalmente.
