Aña pasa tabatin 63 localidad ta bende klapchi...
- Suplica pa DOW implementa nan idea di radius di 10 meter
- Kier evita peligro cu puntonan di benta ta representa
ORANJESTAD (AAN) Aña pasa mes, DIARIO a raporta cu na December 2025 un total record di 63 rebendedor di Klapchi a habri nan porta pa bende na productonan cu comunidad. (Na 2024 tabatin 48 rebendedor so). E cantidad di klapchi cu a yega Aruba tabata ‘regular’ manera den pasado, pero e hecho cu tabatin mas punto di benta, a pone cu e tabata mas facil pa yega un lugar y cumpra.
Pero pa algun observador, e ponemento di container cu klapchi aden na cualkier lugar sin tene cuenta cu e area rond, ta birando un preocupacion. Djis pensa un rato riba e explosion gigantesco di 25 aña pasa na ciudad di Enschede na Hulanda, unda 23 hende a muri, 950 a keda herida, 400 cas a keda destrui y como 1.500 edificio a ricibi daño. Sin lubida e desastre na Culemborg (Hulanda) como 35 aña pasa, cu tabatin un impacto grandi ora cu vuurwerk a pega candela simultaneamente, lagando 2 hende herida, y como 30 hende herida, y cu a ocasiona daño structural fuerte den e area rond.
Un grupo local ta preocupa cu si e cantidad di rebendedornan sigui crece, cu ta tur caminda e containernan di klapchi lo cuminza habri, cu tur e consecuencia cu e por trece cu ne. Pesey di awor caba na Januari, nan ta haciendo un suplica pa instancianan tuma tur e casonan den exterior como prueba palpabel cu algo por socede riba e isla aki tambe den e sentido ey.
Preparando pa December 2026: E dianan aki a haya sa cu comerciantenan importador di clapchi ta finalizando nan lista di pedido, esta di klapchi fresco for di China.
E chens ta grandi cu aun mas hopi klapchi lo wordo importa. Consecuencia di esey ta cu lo tin di bin cu mas reglamento estricto, mas control, acepta dialogo y sugerencia di comunidad, y tambe esnan cu ta proteha cuido di animalnan na Aruba, pa asina por tuma decision crucial na tempo pa e aña aki.
Hecho ta cu awendia, kende cu ta por manda busca klapchi y importa aki y cuminza bende. Na December 2025, cu e 63 puntonan oficial di benta, tin algun area cu a haya bendemento di klapchi den zona residencial. Dos container di bende klapchi tabata situa como 2 of 3 cas mas leu di otro. Na December 2025 tabatin situacion na Aruba, unda dos bendedor di Klapchi tabata situa dilanti otro, na ambos banda di caminda.
Aki ta corda riba un caso cu a socede na bario Tatuapé na parti oost di São Paulo (Brasil) unda un lugar di bende klapchi mey-mey di pueblo a explota, matando un persona y lagando 10 hende herida. E persona encarga cu klapchi ta esun cu perde su bida den e explosion. Debi na esaki, 23 cas rond di e lugar di explosion a wordo destrui sea door di e explosion, of di candela cu a sigui despues.
Ban actua preventivo pa evita cu algo asina socede na Aruba. Y tin hopi forma pa haci esey, door di stipula reglanan pa indica claramente unda mag di pone Container, y unda no. Pasobra si un explosion asina socede, e lo por bira grandi y impacta tur bisiña cerca di e rebendedor.
Regla di 10 meter: Den pasado, DOW mes ta esun cu a bin cu e idea pa den futuro exigi cu tur punto di benta (Container) no mester tin nada construi den un straal (diameter) di 10 meter rond di dje. Pues e idea di DOW ta pa prohibi cu den 10 meter rond di e lugar di bende klapchi, tin obheto of cas.
Algun persona ta haya cu e regla di 10 meter ta un tiki demasiado, y pa Aruba kizas un straal di 8 meter mes ta suficiente. Si e container di klapchi explota mes, e daño rond di dje ta bay wordo hopi limita. Esey ta algo cu e grupo local ta desea pa DOW cuminza implementa kizas urgente. Pasobra si bo mira con na otro paisnan tin explosion regular envolviendo klapchi, tin di actua na forma preventivo y evita cu esaki por socede na Aruba.
Awor cu ta e dianan cu importadornan tin di haci bestelling di klapchi, lo ta bon idea pe revisa tur regla y si acaso bin cu e idea di straal di 10 meter (hopi ta haya cu 8 meter ta suficiente), e ora busca forma pa introduci esaki como regla, y por fabor notifica tur importador rapidamente pa asina nan sa di antemano cu kizas regla ta cambia, y no por djis hisa benta habri Container di klapchi hopi cerca di casnan mas na Aruba. Pues informa nan prome cu e bestelling di 2026 wordo haci.
Si DOW bin cu e medida di straal di 8 meter, e lo bay evita rapidamente cu Containernan di bende klapchi ta habri asina cerca di otro, y tambe asina cerca di cas- of edificionan. Pero pa seguridad tin di haci esey, y na mesun momento ta suprimi e ‘Free-for-All’ cu den bista di hopi persona, a socede den 2025. Un Free-for-All unda explosivonan tabata envolvi.
