ORANJESTAD (AAN): E grupo local di Stichting Rainbow Warriors Core, cu ta un organizacion internacional pa desaroyo sostenible y di derechonan humano cu sede na Aruba,
a haya sa den fin di siman cu un grupo chikito di turistanan di Ucrania ta di vakantie na Aruba. Milton Ponson di e grupo di Rainbow Warriors, a indica cu debi na e desaroyonan cu cada rato ta escalando na Ucrania, cu e conflicto di guera cu Rusia, y e impacto di problema di viahenan, nan lo kier sa kico lo bay pasa cu e turistanan aki.
Como cu riba Diadomingo, e president di Ucrania a declara cu e espacio aereo di su pais a bira un ‘No-Fly Zone’, esaki lo impacta plannan di viahe pa y for di Ucrania. Ponson a haci un suplica na autoridadnan local competente, y tambe representante local di UNHCR pa check e asunto aki y kizas duna un man na e viaheronan aki cu kizas lo keda pega.
Milton Ponson a indica cu nan grupo local ta vigilando di cerca tur e desaroyo di e conflicto di Rusia y Ucrania, pero tambe alavez ta sigui pa basta tempo caba loke ta pasando na Venezuela, unda Rusia a sa di bay “ubica” y staciona algun avion di transporta bom, y otro equipo belico cu segun nan, ta dirigi pa defende nan mes di Colombia.
Toch Rainbow Warriors Core ta kere cu tanto Gobierno di Aruba como tambe Gobierno na Den Haag tin di splica exactamente loke e conflicto Ruso-Ucraniano aki nifica pa Reino Hulandes y islanan den Caribe Hulandes, specificamente Islanan ABC cu ta hopi cerca di Venezuela cu ta un aliado fuerte awor di Rusia.
E hecho cu Hulanda den pasado a yega di ta activamente envolvi den interesnan di Ucrania, y e hecho cu den pasado hasta e comision investigativo cu a studia e atake riba e avion di Malaysia Airlines cu a cay na Ucrania tin su sede na Hulanda, y a acusa Rusia di a
Con preocupa Aruba mester ta awor cu e conflicto di Rusia y Ucrania ta escalando asina pisa? Algo cu a wordo detecta den fin di siman, ta cu tin un aumento nunca antes bisto di atakenan cybernetico, como cu gruponan di hackers riba Internet ta cuminza escoge ki banda di e conflicto nan ta defende, y asina ataca e “otro banda”.
Siman pasa caba e grupo di Anonymous a laga sa cu nan lo bay ataca tur internet servers di instancianan gubernamental Ruso, y a haci esey tambe caba. Sinembargo tin di tene cuenta cu den e conflicto aki, bo por haya gruponan oportunista cu ta probecha di esaki pa trata na comete atakenan na otro areanan tambe cu tin nada di haber cu e guera.
Pa e motibo ey, na Aruba tampoco no por ignora e menaza aki. Compania- y instancianan gubernamental tin di double check con fuerte nan firewall di computer ta e dianan aki, pa asina ta cauteloso cu ningun atake lo por ripiti loke a pasa cu Aruba na 2020 cu e atake cybernetico riba Hospital di Aruba.
Y claro, tur instancia esencial di Aruba, incluyendo Aeropuerto, tin di bay haya extra vigilancia e dianan aki awor cu e conflicto ta andando.
