ORANJESTAD (AAN): Esnan cu a yega di haya boet y ainda no a pasa esaki, tin di tene bon na cuenta cu Ministerio Publico lo cuminza intensiva e cobramento di boetnan habri entrante e siman aki.
Ta trata di boetnan di aña 2019 te inicio di 2021 cu ta habri ainda.
Segun Ministerio Publico a indica riba Diaranson, cu den e cuadro ey Grenspolitie na Aeropuerto lo para pasaheronan y atende nan riba nan boetnan habri. Bo tin di atende e asunto ey, prome cu bo worde permiti pa subi avion y bay pa bo e viahe.
Den e cuadro aki, DIARIO a haya sa cu Grenspolitie tin un POS-Machine di banco tambe, esta un ‘mashin di swipe’ di Ministerio Publico, loke ta facilita e pagamento na frontera prome cu sali cu vakantie.
Riba e carta di boet tambe ta duna opcion pa paga via online stransfer.
A ser splica na DIARIO, cu e accion aki lo dura te fin di aña y lo bira cada biaha mas pisa. Esey nifica cu Ministerio Publico lo sali activamente en busca hendenan cu keda sin paga boet y e hendenan aki lo core riesgo pa mester sinta nan detencion preventivo den KIA.
