Josephine Albertus a splica:
ORANJESTAD (AAN) – Diamars di e siman aki, esta dia 27 di September, un grupo di e gremio sindical y comercial, organizacion, a manda un carta pa Utilities Aruba NV, pasobra nan tur a tuma nota di e rueda di prensa di Asociacion VWI di profesionalnan trahando cu contract na WEB Aruba NV, dia 20 di September, unda nan ta mustra preocupacion riba e proyectonan nobo.
Asina Josephine Albertus, presidente di SIMAR, a expresa den un entrevista. El a splica cu un siman despues, esta Dialuna 26, e gremio sindical, comercial y otro organizacion a reuni cu Asociacion VWI y a bin na SIMAR cu un “power point” unda nan a splica cu tin tres punto di preocupacion riba e desaroyonan nobo cu tin door di e proyectonan nobo.
Segun Albertus, ora nan a haci pregunta pasobra nan a papia di e “Good Governance” na unda gobierno mester ta transparente, duna informacion, y nan a papia tambe di e procedurenan cu tin na WEB mes pa traha, y nan a bisa cu nan tin añanan bezig cu innovacion y desaroyo. Ademas cu tur nan rapportnan ta wordo analiza door di diferente compania, pasobra ora bo papia di desaroyo ta papia di sumanan grandi cu por afecta e Isla den su totalidad. “Y pa tende awo di nan, cu nan ta bin cu un proyecto nobo, na unda e proceduranan aki no ta cana manera mester. Tin un rapport pero e tin ‘non discuss’ riba dje y ningun hende por lese. Nan a bin cu puntonan, pero e ta keda preocupante y si nan como profesionalnan sali dilanti y bisa esey, pa nos tambe ta preocupante”, Albertus a señala.
Locual ta importante pa e gremionan ta, cu si nan por a tuma nota un par luna pasa, na unda cu a yega un anuncio: subida di prijs di awa y coriente. “Tur hende na Aruba ta bisa cu nan no ta ins cune, pasobra e ta afecta e pueblo, costo di bida a subi hopi caba, y ora nos a tende di e profesionalnan aki, nan a vocifera cu for di aña pasa caba, tabata trece padilanti pakico mester subi prijs di awa cu coriente”, Josephine Albertus a señala.
Albertus a agrega cu esnan cu mester tuma decision a keda warda y por y ta si na e momento ey esnan cu a bisa cu mester subi prijs di awa cu coriente lo a sinta den dialogo, por ta cu 2% so nan lo a subie.
Awe, e maneho cu nan a hiba a conduci cu e ciudadanonan tin cu paga un aumento di 26%. “Nos sa cu cada desaroyo ta bin cu consecuencianan financiero, pero nos kier si, pa e desaroyonan aki bay na un forma responsable, pasobra bo kier mitiga e consecuencianan financiero y nos no kier cana patras di tur cos, manera aworaki cu bo a tende di un dia pa otro, ora bo a bay sinta na mesa cu nan, nan ta bisa bo ‘ya, no por haci nada otro, nos tin cu subie’. Nos ta bisa cu nos kier ta proactive aworaki. Nos ta manda un carta unda nos ta solicita pa sinta cu Raad van Commissaris”, Josephine Albertus a señala.
