Sindicatonan sperando riba reunion pronto riba awa y coriente
ORANJESTAD (AAN): Diaranzon atardi durante un conferencia di prensa, e Gremio- y Sindicatonan a uni y a divulga cu dia 1 di Februari 2023 caba nan a manda un carta pa Gobierno y Februari a finaliza y no a haya ningun contesta riba esey.
Pa e motibo aki, e Gremio- y Sindicatonan aki a dicidi na bay publico pa informa pueblo di e grupo aki, y e desaroyonan cu nan ta mirando.
Edward Maduro di Sindicato SADA, a hiba palabra na nomber di tur Sindicato presente (FTA, SADA, ABV, Simar, SPA, STT, SEPPA), y a splica cu nan tambe a sinta aña pasa na mesa cu Ministro di Energia, hunto cu directornan di WEB Aruba NV, NV Elmar, y Utilities Aruba NV, y nan tambe a ricibi e storia unda ta pidi cooperacion y cu despues di 6 luna lo tene reunion atrobe.
E tempo ey, nan a palabra cu Ministro y demas Directornan, cu mester bin cu un tipo di ‘sociale vangnet’ tambe, pa esnan cu ta pasa den dificultad pa por come across fin di luna. Pasobra tur hende sa cu awendia e costo di bida ta sumamente halto, hopi hende no ta logra di tin suficiente entrada pa un luna completo. Hopi trahador den tur sector dia aden ta lucha pa sobrevivi, pesey e gremio Sindical ta haya cu awor mas cu nunca mester bin cu mas parti social pa esnan cu ta den e tereno laboral.
Sindicatonan a sinta hunto cu Pensionadonan di OPPA tambe, den presencia di Ministro. Aki a bin cu hopi storia, y splicacion unda a palabra cu despues di seis luna lo bin bek na mesa pa asina duna un bista con e situacion ta bayendo, como cu e palabracion tabata cu e tarifanan di awa y coriente mester baha.
“Nan mester baha pasobra e ta necesario, pa nos por sigui bay dilanti,” Maduro a indica.
Tristo cu ta manda carta pa Ministro, y 1 luna completo a pasa y no a ricibi ni un contesta, sigur esey ta falta di respet. Pesey awe por mira e gremio comercial y sindical ta bin hunto pa mustra cu e cos aki ta serio.
“Mi ta haya cu e momento a yega pa nos gobernantenan bira un tiki mas serio pa e parti aki, pasobra e situacion di hendenan den nan hogar ta pasando den dificultad y nan tin cu yega un momento pa stop di papia bunita y pone accion tras di nan palabra,” Maduro a indica.
E aumento di awa y electricidad ta afectando tur hende, incluyendo esnan den Ambtenarij. E grupo aki mes tambe pa hopi aña ta wardando riba ahustacion di indexering, pasobra costo di bida ta sigui subi pero ahustacionnan no ta yega.
