Dolor fuerte pa Caribbean Shootout 2024: Mega Jet Car Invasion
- Freddy Ras tabata un mecanico cu amor inmenso pa Motorsports
- Decision tuma cu evento lo sigui henter weekend
ORANJESTAD (AAN): E gran evento di drag race ‘Caribbean Shootout 2024: Jet Car Invasion’ cu ta programa pa dianan 3, 4, 5, y 6 di October pa celebra e di 35 aniversario di Brazillian Flash Racing Foundation, a sufri un golpi emocional duro ora cu Diaranson anochi durante un “Anochi di Prueba” na Pista di Palo Marga Raceway Park un miembro stima di e organizacion a wordo herida den accident, y despues a haya sa cu el a fayece.
Dos dragster di nan: Pa e evento di Caribbean Shootout 2024 tin participantenan di Curaçao ta bin cu auto y brommer. For di Puerto Rico ta bin nan gran amigo Carlos Diaz cu su Vega Wapacha. Ta bin tambe su yiu homber Carlito y un otro amigo Pepe di Puerto Rico cu lo bay core e Dragsternan di Brazilian Flash cu bandera di Puerto Rico.
Carlito y Pepe ta bin di Puerto Rico pero no ta bin cu auto di careda. Nan a pidi pa Brazilian Flash na Aruba huur nan auto na nan, y como cu e organizacion local no tabatin intencion di core e dos Dragsternan di Brazilian Flash, a dicidi na huur esaki na e dos Portoriqueñonan, cu ta bay core bao di e bandera di Puerto Rico.
Pesey mes, debi cu nan ta huur e dos Dragsternan aki na e drivernan di Puerto Rico, tabata haci preparacion pa esaki tambe durante e anochi di prueba. Den e Pit-Area unda e mecanico- y autonan ta staciona, un accident serio a socede poco despues di 9:20 pm cu un di e Dragsternan aki.
Cende e motor: Dado momento a start un di e Dragsternan aki pa check su tune-up y mira si tur cos ta bon. Hendenan eybanda a tende e motor a keda revv bay halto, comosifuera e throttle a pega. Diripiente na forma inespera e vehiculo a drenta den gear. E impulso di bay dilanti a sorprende e mecanico Freddy Ras cu den e fraccion di seconde ey no por a haci nada mas. E wielnan a pasa riba su curpa, incluyendo e wiel grandi parti patras, cu a pasa riba su cabez. Expertonan ta mustra cu loke a socede no ta un eror humano, sino fayo den motor.
Esaki a ocasiona multiple trauma na su cabez y craneo, y el a keda eybao cu sanger saliendo for di boca y orea. Mesora a core pidi presencia di e unidad di Ambulance cu semper ta para eynan riba ‘Standby’ pa sea Anochinan di Prueba of durante Caredanan Oficial.
Mesora e unidad a yega, y bin nota cu Freddy ta tur na sanger, y cu keto bay ta sigui di ta sangrando. Pero a nota cu e tin dificultad pa hala rosea, y diripiente a manera bay den shock y a stop di reacciona. Aki ta unda cu esnan di Ambulance a cuminza practica CPR riba dje, y a pidi pa mas Ambulance of Rapid Responder bin duna un man. Unidad di Brandweer eynan tambe a yega cerca pa mira si por yuda.
Dado momento cu a mira cu a stabiliza e victima un poco, a dicidi bay cune den Ambulance cu urgencia pa Servicio di Emergencia na ImSan, unda Docternan mesora a traha riba dje pa trata na stop sangramento y mira con por sigui dune tratamento pa stabiliza. Brandweer e ora na Palo Marga a spuit awa riba e plas grandi di sanger cu a keda abao den Pit-Area.
Pero na ImSan tabata bisto cu Freddy ta den situacion critico, y a opta pa mande pa Dr. Horacio Oduber Hospital pa tratamento mas avanza. Cu Ambulance a sali rumbo pa Playa, y aki Cuerpo Policial a duna un man pa habri caminda pa Ambulance yega mas rapido.
Infuus di sanger y mas: Na yegada na Hospital a cuminza trata mesora riba dje pa mira con ta stop mas hemoragia, y aki tambe a dune infuus di sanger debi cu el a perde bastante. Pa varios dos ora a keda traha cune, pero e multiple trauma na cabez tabata demasiado grave pa Freddy. Pero pa 11:30 pm, Docter a constata morto di Wilfred E. Ras (‘Freddy’), naci na Aruba dia 15 di Mei 1959, pues tin 65 aña di edad. El a fayece debi na seriedad di heridanan.
Testigonan a indica cu e unidadnan di Ambulance a keda hopi na sanger mes, y a bay tuma basta rato pa desinfecta tur cos.
Stop tur prueba: Mientras tanto e accident aki den Pit-Area di Palo Marga, a pone cu organizadornan a dicidi na stop tur prueba cu mester a sigui despues. Mas laat ora cu e informe a drenta di fayecimento di Freddy, un tristeza inmenso, acompaña cu hopi lagrima por a wordo mira na Palo Marga.
No ta djis cerca esnan di Brazillian Flash e informe aki a dal duro, sino cerca tur otro team cu ta participa. Esey ta debi cu Freddy Ras ta conoci como un persona hopi social, cu ta cana rond den Pit-Area y ta bay combersa cu mecanico- y drivernan di otro teamnan pa asina check cu nan con ta bayendo, y si acaso e por yuda cu algo. Conoci como un persona cu no ta bebe of tin otro vicio, e ta carga pesey respet cerca varios otro persona den mundo di deporte di motor.
El a pasa Diaranson henter dia ta check tur autonan di Brazillian Flash pa nan ta cla pa e caredanan di e weekend largo aki. Y su morto a yega net prome cu e gran evento aki celebrando nan di 35 aña di existencia.
Freddy su amor pa deporte di Dragrace ta data di hopi decada pasa caba. E ta un mecanico di profesion, y tabata encarga cu vehiculonan Heavy Equipment di Serlimar SG te cu algun tempo pasa el a baha cu pensioen. Pero e energia tey pa sigui traha riba motornan cu ta algo cu semper el a stima. Su famia tambe sa di esey, y tabata apoye 100% incondicionalmente.
Na famia, ex-coleganan, y henter e team di Brazilian Flash Racing Foundation y demas coredornan di Dragrace, DIARIO ta manda su mas sentido palabra di pesame.
