Ex Sindicalista Gregorio Wolff cu argumentonan pa e golpi militar
ORANJESTAD (AAN) – E ex-lider sindical Arubano, esta Gregorio Wolff, a refleha recien riba golpi di Estado na Nigeria, cu ta un tema di interes y discusion mundial, y e ta comparti cu DIARIO su opinion. Un tema extenso, cu DIARIO ta parti’e den un par di articulo, cuminzando cu su prome punto: “Argumentonan pa e golpi militar”.
“Dia 26 juli, ultimo na Nigeria, un ex-colonia Frances na Africa Occidental, e guardia presidencial a comete un golpi di estado y a baha e presidente di e pais, Mohamed Basoum, kende algun aña atras a ser scogi den eleccionnan. Hefe di Estado nobo ta Abdourahabane Tiani.
Tiani su principal argumento pa e golpi di Estado ta e inseguridad door di muslimnan radical den e region aki, unda na Nigeria miles di soldat a bira victima mortal, apesar di e basenan militar di Francia y USA.
Francia y USA tin basenan militar na Nigeria, cada cu cerca di mil militar.
Otro argumento ta e relacion financiero-economico malo cu occidente, unda materia prima ta sali barata di Nigeria y na Europa ta ser bendi caro. Nigeria ta un productor grandi di uranio.
E gobierno nobo di Nigeria a trece dilanti poco dia pasa cu Francia ta saca masha hopi uranio hiba Francia, pero den tur e añanan nan no a construi un dam pa produci coriente na Nigeria.
Algo cu e militarnan rebelde no a trece dilanti ta cu sigur mester tabatin malcontento bao ehercito Nigeriano door di decisionnan di e gobierno Basoum.
Tambe e hecho cu ultimo tempo, dos pais na occidente di Africa, Mali y Burkina Faso, ex-colonia di Francia, paisnan pober y cu hopi inseguridad, pa motibo di e musulmannan radical, a conoce golpinan di estado cu consecuentemente nan a pidi Francia pa saca su tropanan for di e paisnan aki y nan a acerca Rusia. E hecho aki a keda demostra via manifestacionnan di e pueblo Nigerieno cu pancartanan mustrando nan apoyo na Mali y Burkina Faso y e cantidad di banderanan di Rusia.
Africa un pais rico na productonan, pero manteni pober door di e Neo-liberalismo: Nigeria ta un di e paisnan mas pober di mundo y bao di presidente Basoum, e ultimo aliado di Occidente na Africa occidental, e pobreza ta sigui crece.
E problema grandi di Africa ta cu su productonan ta yega Europa barata y di eynan nan ricibi balornan mas caro, pues Africa ta worde explota barbaramente. Un ehempel, e uranio Nigeriano ta worde bendi cu companianan Frances pa $ 11 pa kilogram y na Europa ta bende na e compania di corriente pa $ 215.
Hecho ta tambe cu na e cumbre di Rusia cu paisnan Africano, na St. Petersburg Rusia, cu asistencia di 49 pais, di e 54 paisnan di Africa, esaki tabata un punto di discusion. Nigeria, bao presidente Basoum, tabata un di e 5 paisnan Africano cu no tabata presente.
Merca y Union Europeo sa cu e situacion di pobreza extremo no por sigui na Nigeria, nan a hole tambe un posibel golpi di estado, pesey ultimo tempo, cu urgencia, ayudo humanitario, inversionnan y trainingnan militar a ser manda pa Nigeria, for di paisnan di UE (Francia) y Merca.
