Shurman Milliard:
ORANJESTAD (AAN): Den un entrevista cu DIARIO trahador social di 131 Shurman Milliard a indica cu 131 tabata druk cu diferente tema, incluyendo salud mental y auto mutilacion.
El a splica cu tin muchanan cu ta sinti hopi preocupacion pa locual nan ta wak rond di nan.
“E tipo di casonan ey a aumenta y si bo lesa corant mes bo ta wak cu e problemanan den comunidad pa loke ta salud mental ta sigui aumenta, tambe bao di mucha y hobennan”, segun Millard.
El a sigui bisa cu locual cu bo ta wak bao di e hobennan no ta cu nan ta pensando di tuma nan propio bida, sino cu nan tin preguntanan riba nan norma y balornan y kico ta importante pa nan.
“Nan ta puntra nan mes kico e comunidad ta pensa cu nan como hoben mester haci y e preguntanan ey cu ta mustra cu nan no sa den ki direccion nan mester cana, ta trece diferente sentimento pa e hobennan, unda cu tin cu ta corta nan mes (auto mutilacion) y otronan ta bay asina leu di pensa riba suicidio”, segun e trahador social.
E intencion di 131 ta sigur pa yuda e hobennan wak un manera con pa haya sa kico e norma y balornan ta pa nan y kico ta e norma y balornan ta di comunidad.
Segun Milliard, e temanan aki sigur ta parti di e diferente charlanan cu 131 ta tene.
“Importante ta tambe pa mustra riba e hecho cu e personanan cu ta responsabel pa enseñansa y crecemento di nan yiunan ta e tata y e mama, pues no ta Gobierno of 131”.
Gobierno y 131 tey si pa duna sosten y laga sa kico por ofrece como yudansa, pero e responsabilidad tur ora ta keda cerca e tata, mama of otro educador cu ta den e cas unda e mucha ta, segun Milliard.
