Resultado baha BBO na mita, ta advertencia ora baha entrada di pais --- Efecto di aumento prijs di gas natural cu 30 porciento na Merca --- 2020 ta termina cu reto financiero y economico anuncia pa DIARIO
ORANJESTAD(AAN)- Pa basta tempo DIARIO a prepara Aruba pa desaroyonan cu por tin impacto riba poblacion na entrada di 2022.
E necesidad pa recuperacion despues di e pandemia di Covid-19, a exigi di gobernantenan rond mundo pa nan revisa nan planificacion den cual mester tene cuenta cu e debenan cu a pandemia a laga atras pero tambe inversionan mas halto pa atende asuntonan cu tabata riba programa.
Na momento cu prijs di petroleo a cuminsa subi, DIARIO a sigui informa Aruba riba e realidad di e impacto cu awe ta sinti tur caminda mientras prijs internacional ta afecta prijs di Aruba, cu ta depende di importacion.
Gobernacion na e momento aki, riba plataforma mundial, ta sigui bira un reto cada bez mas grandi y gobernacion mester tene cuenta cu tur aspecto pa asina por dirigi un pais.
Continuamente DIARIO ta sigui vigila mundo pa por informa Aruba, cu no solamente mester resolve problemanan cu Covid-19 y Crisis di Petroleo a crea, pero mester sigui biba cu e realidad cu a wordo crea pa falta di vision gubernamental den pasado.
Awe Gobierno Wever-Croes 2, mester resolve un decada di caida di Aruba, cu a cuminsa for di 2010 ora Valero a bay y na e momento di crisis aki, Gobierno Mike Eman a dicidi di deshaci di mita di e entrada di BBO pa hunga politica.
Deshaci di BBO tabata un grito di locura y su efectonan ta wordo describi den tur rapport, cu awe Aruba mester bolbe consulta, si e kier evita pa e pais trompeca na momento cu e mester recupera si e kier sigui avansa.
Mas cu un decada pasa, inicio a wordo duna na caida di Aruba, cu hunto cu mundo a conoce e Great Recession na 2007, cu a exigi tur gobierno na mundo tuma medida.
Aruba a reforma belasting y a introduci BBO na un forma cu a afecta Aruba seriamente. E sistema acumulativo di BBO tabata tin impacto y mester a wordo elimita pero no por a deshaci di BBO sin destrui Aruba.
Esaki ta loke a socede y for di 2020 tabata conoci cu Aruba lo ta den problema serio pa hopi tempo, mas ainda si uza 1.6 Biyon sin ningun control.
