Hunto cu Departamento DRH ta haciendo esaki
ORANJESTAD (AAN): Un pregunta importante cu Prome Minister a ricibi durante tratamento di e Nota di Fin di Aña 2022 (Najaarsnota 2022) siman pasa tabata tocante di DIP. Ya pa algun tempo e situacion na DIP ta conoci cu tin atraso pa loke ta trata peticionnan pa tereno pa agricultura, residencial y pa inversionistanan. Prome Minister Evelyn Wever-Croes a splica cu ta trahando riba un solucion, sinembargo ainda no a logra yega na un solucion duradero pa motibo cu pa hopi aña e departamento tabatin metemento politico.
Un di e causanan probabel di e situacion na DIP ta pa motibo di corupcion cu a tuma luga den e departamento di parti di ex ministernan cu tabata encarga cu e departamento. Ademas a otorga trabao na personanan pa facilita procesonan politicamente y consecuentemente tin hende na e departamento cu no por cumpli cu e trabao y atende cu e demanda manera cu tin. Pa motibo di e mal manehonan menciona, cada biaha tin un investigacion nobo cu ta inicia, pa cual Landsrecherche ta bay cu cahanan y file. Ora esaki tuma luga, tur peticion cu pa casualidad ta den e caha aki, tambe ta worde hiba perhudicando esnan cu a entrega peticion pasobra no por sigui traha riba nan.
Prome Minister Wever-Croes ta reconoce cu tin hopi persona cu ta trahando duro den e departamento aki y cu ta integro, pero lamentablemente e circumstancianan caminda cu cada bes tin un cos ta bin dilanti, ta strobando procesonan. ‘Realidad ta cu e situacion aki tin e departamento manca.’
Finalmente, Prome Minister Wever-Croes a enfatiza cu ta trahando riba algun alternativa hunto cu Departamento di Recurso Humano (DRH) pa yega na un solucion mas pronto cu ta posibel. Tanto caso Avestruz como caso Kukwisa ta causa atraso den DIP, pero Dip tin atencion completo di Gobierno di Aruba. E aña aki ta aña di inversion y di oportunidad, y DIP ta hunga un papel hopi crucial den esaki.
