Segun Minister:
ORANJESTAD (AAN) Minister demisionario Ursell Arends y alavez Lider di Partido RAIZ, den entrevista cu DIARIO a menciona cual ta su vision tocante e surplus cu gobierno a crea y esey por logra baha e BBO of kit’e mes.
Arends a señala cu por wak den comercio y varios lider politico, cu tur hende ta papiando cu mester bay di BBO pa BTW, pero e ta kere cu esaki ta un proceso cu lo tuma su tempo. “No por hisa benta di awe pa mañan con bo kier haci e cambionan aki; pero gobierno di Aruba tin suficiente entrada cu nos mester bay re-aloca y priorisa con nos mester uza e fondonan aki.
Mester cuminza na devolve esaki na nos ciudadanonan, duna alivio na comercio, p’asina aki nos por mitiga y elimina e impacto cu ta wordo poni riba costo di bida. Esaki ta cosnan cu ta bin dilanti den nos perspectivanan, cu e aña aki ta titula: ‘Biba bon, biba contento” y kico ta e punto di salida?
Devolve e dignidad economico na nos ciudadanonan y tambe prepara y duna oportunidad pa comercio prospera p’asina aki, sirbi e comunidad”! Ursell Arends a declara.
