Ivo Valdez, Presidente di OPPA:
ORANJESTAD (AAN) – Presidente di e Organizacion di Pensionadonan Publico Aruba (OPPA), Ivo Valdez, den entrevista cu DIARIO a sigui bisa cu Prome Minister ta bisa cu ora cu nan a saca APFA (Fondo di Pensioen), cu a bira un Stichting, nan mes no tin nada di bisa.
Esaki relaciona cu e Gelijkbedrag di pensionadonan, cu ta e tema central di e entrevista aki.
Segun Valdez e mandatario ta lubida cu APFA ta maneha e areglo di pensioen pa e trahadornan di gobierno. “Kiermen, e tin tur coi bisa”, el a expresa.
Esaki pasobra no ta e trahado so ta paga un prima, gobierno como dunador di trabao tambe ta paga un prima. “Dus, APFA tin tur cos di bisa den e fondo ey” el a remarca.
Ivo Valdez a sigui splica cu e motibo pa cual APFA, e tempo ey PVL, mester a bay pa MTL 2011, y e areglo mester a wordo cambia ta cu enberdad na 2018 tabata tin un crisis financiero mundial, unda APFA a perde placa, pero esey no tabata solamente e problema; antes ora un persona tabata kier baha cu pensioen “aki tres aña” prome cu e bay diripiente tabata haya aumento di salario anto e no tabata paga e “bek service” cu mester a paga pa por a cobra e 70% di locual mag goza di dje e ultimo dos añanan. Pues, a cambia e areglo di pensioen anto e tempo ey e grado di cobertura tabata 85%, “Kiermen ningun fondo di pensioen por keda na bida, cu un cobertura asina aki”, Valdez a subraya.
