Segun Director di Hospital, Jacco Vroegop:
- Special cuido brinda na personanan indocumenta
ORANJESTAD (AAN): Durante un entrevista cu DIARIO, Director di Hospital, Jacco Vroegop, a expresa su preocupacion tocante e presion creciente financiero cu Hospital ta enfrenta como consecuencia di cuido medico brinda na personanan indocumenta.
Segun Vroegop, durante añanan Hospital a mantena dialogo y a manda diferente carta na Gobierno y otro instancia concerni pa yega na un solucion. E cantidad di personanan indocumenta cu ta busca cuido medico na Hospital a aumenta considerablemente, entre otro como consecuencia di e situacion na Venezuela. Sinembargo, te ainda no a logra establece un sistema efectivo pa cubri e gastonan relaciona cu e cuido aki.
“Hospital ta existí pa tur hende, sin distincion di ken bo ta, bo color, di unda bo ta bin of si bo tin seguro of no. Nos semper tey. Esaki ta nos vision. Pero e cuido cu nos ta brinda mester wordo paga door di un instancia,” Vroegop a enfatisa.
Actualmente, e Director a confirma cu Hospital tin aproximadamente Afl. 29 miyon na cuenta habri pa cuido medico cu a wordo brinda na personanan indocumenta of ilegal. E suma aki ta representa gastonan real haci pa brinda e cuido.
Vroegop a indica cu e responsabilidad financiero no por keda exclusivamente riba Hospital. Segun e, Land Aruba, esta Gobierno di Aruba, tin obligacion pa percura pa personanan indocumenta por haya necesidadnan esencial, manera un dak, cuminda, enseñansa, siguridad y asistencia medico. Actualmente, gastonan ta wordo cubri for di otro entrada, entre otro fondo cu ta destina pa cuido di aseguradonan di AZV y un parti di entrada relaciona cu turismo.
Esaki ta pone Hospital den un posicion difícil. AZV corectamente ta indica cu su fondo ta destina pa aseguradonan di AZV y no pa cubri otro grupo. Na mes momento, Hospital no por nenga un persona cu tin necesidad urgente di asistencia medico. Como resultado, e costo ta wordo carga indirectamente na comunidad y por afecta e recursonan disponibel pa cuido di e propio poblacion di Aruba.
E Director a declara cu e situacion aki a wordo discuti cu diferente Minister di Salubridad Publico durante añanan, como tambe cu Minister di Husticia, Minister di Asuntonan Economico, Prome Minister, representante di Hulanda na Aruba, Gobernador, CAft, Ministerio di Salubridad Publico di Hulanda, Nacionnan Uni y organizacionnan cu ta traha cu refugiado. Apesar di tur e conversacionnan aki, ainda no tin un solucion concreto.
Pa esaki, Hospital ta preparando un caso hudicial contra Land Aruba, cu e meta di logra cu e palabracionnan y responsabilidadnan existente wordo cumpli. Vroegop ta enfatisa cu e asunto no ta un cuestion cu si personanan indocumenta merece asistencia medico. Hospital lo sigui brinda cuido na tur hende cu tin necesidad.
E punto principal ta cu mester establece un solucion sostenibel y transparente pa financia e cuido aki, sin uza fondo destina pa aseguradonan di AZV y sin laga Hospital, ni e comunidad Arubano, carga e cuenta completo.
Por conclui, segun Vroegop, Gobierno mester asumi su responsabilidad y establece, den dialogo cu tur instancia concerni, un fondo of mecanismo structural pa cubri e gastonan di cuido medico pa personanan cu no tin seguro.
