Minister Geoffrey Wever:
ORANJESTAD (AAN)—Minister Geoffrey Wever, titular di Economia, Comunicacion y Desaroyo Sostenible, ta conciente cu “retail” tin hopi reto den centro di ciudad pa diferente motibo, entre otro, prijs di localidad.
E mandatario a señala cu no por bisa nan pa baha prijs pasobra esey ta den man di sector priva, y hopi di e negoshinan cu a cera a bay na e area di hotelnan, den “street malls” cu ta mas economico y e parkeo mas accesible.
E dignatario a bisa cu awo ta enfocando riba Wilhelminastraat cu mester bira un centro culinario, y gobierno a set up e trayecto aki caba. “Tin diferente bon restaurant den e area di Wilhelminastraat, y nan a haci e renovacion di Columbusstraat cu Wilhelminastraat, a traha e plaza nobo y siman pasa a cuminza cu e di dos fase di e edificio y a sigui inverti den Wilhelminastraat y ora caba cu henter e area aki, lo sigui cu e parkeo di Lagoen.
Lo drecha full e area aki y lo percura pa tin mas luz, mas mata pa e ta mas agradable y e hendenan sinti nan mes mas sigur. “Nos ta kere cu Wilhelminastraat y Oranjestad tin un potencial grandi pa bira un capital culinario, ofreciendo nos turistanan algo mas autentico y diferente. Tin turistanan cu awendia ta busca algo mas autentico y nan por drenta den nos centro di ciudad, wak nos monumentonan, wak con nos ambiente ta den nos capital, y ya hopi comerciante ta enfocando caba riba esaki”, Minister Geoffrey Wever a señala.
E mandatario a subraya cu no ta gobierno su idea pero nan a wak kico e comerciantenan ta haci y gobierno ta empodera nan y inverti hunto cu nan. “Nan tabata tey pero e area ta abandona, y gobierno a pensa den drecha e area pa asina ta mas agradable pa local y turista yega eynan y asina inspira otro comerciantenan pa sigui den e direccion ey, por ehemplo pa Caya Principal y Caya Betico Croes.
