Formadornan ta presenta exigencianan Hulandes cu mester ta base
*Formadornan mester splica con atende cu un Hulanda Europeo
*Desaroyonan preocupante na desesperacion social Latino Americano
ORANJESTAD (AAN) — Durante ultimo dianan ta cuminsa haya un impresion den cual rumbo e formadornan di un Gobierno nobo pa Aruba, kier dirigi nan maneho.
Loke nan ta trece dilanti ta confirma loke DIARIO a bisa for di principio di formacion, cu nan mester tene nan mes na e reglanan di bon gobernacion cu Reino Hulandes a exigi pa asina a yuda Gobierno Wever-Croes dirigi Aruba den e rumbo positivo cu Aruba ta actualmente.
Mientras e formadornan nobo cu nan plannan pa baha gastonan den gobernacion realmente ta confirma cu nan mester duna continuacion na e base di austeridad cu a bira e base di e milagro financiero y economico di Aruba cu e Gobierno Wever-Croes, e situacion mundial ta indica cu nan no tin otro opcion tampoco.
Ta bira tempo pa formacion di un gobierno nobo di Aruba, bandona e arena politico di subi pensioen di behez y otro promesanan cu a entrega nan voto, pa nan splica Pueblo di Aruba, con realmente nan ta bay atende cu e situacion mundial na mes forma cu Gobierno Wever-Croes a sabi di dirigi Aruba for di e calamidad cu e dos gobiernonan di Mike Eman a laga atras pa despues den un pandemia, hiba Aruba na e logronan cu Reino Hulandes a splica mester ta e formula cu e gobierno nobo ta mantene.
Wega pa haci politica y necesidad pa na un forma urgente yega na un gobernacion pa Arubam ta e necesidad cu ta presenta su mes cu mas urgencia tur dia, mientras mundo conoce situacionnan alarmante cu ya a exigi Reino Hulandes tuma medidanan importante.
Gobierno di Aruba mester spera sigur e continuacion di demanda pisa Hulandes pa continua cu un bon gobernacion financiero manera a wordo hiba dor di Gobierno Evelyn Wever-Croes, na momento cu Hulanda como parti di Union Europeo ta directamente envolvi den e situacion peligroso cu ta presenta su mes na Europa.
E plan defensa di Hulanda como parti di Union Europeo cu mester enfrenta influencianan manera di Rusia, porfin a haya sosten Hulandes na un Europa cu ta ocupa un lugar central den e ruidonan di guera pa cual Aruba tambe mester wordo prepara.
Na e momentonan aki ya e formadornan di Gobierno, como proximo dirigentenan di Aruba, mester duna comunidad un bista di loke por spera den un economia mundial dirigi pa guera.
Economia ta loke ta pone placa lora na mundo y ora pone tur noticia hunto, na e momentonan aki mester confirma cu economia mundial conoce como uno di su puntonan grandi di sosten, e armamento mundial, cu ta pone placa lora den preparacionnan pa riesgonan di guera.
Ademas di esaki ta mira cambionan sigur den e gobernacion nobo di Merca, cu a duna inicio na loke ya el a cuminsa adelanta, cu ta por ehempel ehecucion di medidanan pa pone un fin na entrada ilegal na Merca.
Amenazanan serio di Merca enfrente e posibilidad pa uza armanan economico contra Venezuela, a duna como resultado cu Venezuela a bay di acuerdo pa sigui sostene e accion di deportacion di Venezolanonan ilegal for di Merca.
Na mes momento sin duda Venezuela tambe ta wordo impacta cu un prijs di petroleo cu ayera a keda den vecindario di 66 Dollar pa baril pa asina sigui sostene cu e situacion economico y comercial mundial, ta leu for di e proyeccionnan cu tabata tin pa 2025.
E situacion mundial ta exigi pa awor Gobierno di Aruba cera e capitulo di promesanan politico y porfin termina cu formacion y presenta na Aruba nan plan concreto di gobernacion cu mester ta e maneho basico pa Aruba den un situacion mundial sumamente peligroso riba tur tereno.
Aruba ta parti di un mundo den un situacion di cambionan grandi. Aruba ta parti di un posicion geografico cu ta pone den porta di un America Latino, cu ta un centro di desesperacion di desesperadonan cu tur resultado cu e por tin pa Aruba den un situacion economico y comercial mundial explosivo y ruido di guera.
Esaki ta e splicacionnan cu awor formadornan mester entrega Aruba den un mundo di cambionan grandi y peligronan eminente mundial, di cual DIARIO lo tene Aruba informa!
