Segun Minister Gerlien Croes:
ORANJESTAD (AAN): Minister Gerlien Croes a reconoce cu Aruba a tarda pa atende e crecimiento di Airbnb y cu Gobierno awor mester tuma medidanan pa regula e sector. Durante un entrevista cu DIARIO, Minister Croes a indica cu Airbnb a crece na un ritmo extremo, mientras cu e desaroyo no a wordo atende na tempo. Segun e minister, esaki a bira un trend di Airbnb y loke ta haciendo awor ta curativo y purba pone e reglanan necesario.
Segun e mandatario, un parti di e problematica ta cu hopi propiedad cu ta opera como Airbnb ta situa riba tereno di cas y no ta nogoshi. A pesar cu ley no ta permiti esaki, e aspecto aki casi no ta wordo discuti. Croes a describi esaki como e “elephant in the room”.
Croes a enfatisa cu, aunke tin necesidad pa Gobierno regula e sector, mester tene cuenta cu tur e aspectonan legal, economico y social relaciona cu Airbnb. Segun e, no ta realistico pa simplemente bisa cu tur e casnan mester wordo kita of cu e actividad mester stop di biaha.
Loke mester pasa, segun Croes, ta un analisis di loke ta permiti bou di e leynan actual y cua cambionan por wordo haci eventualmente den e legislacion existente.
E minister a aclara cu Gobierno no tin problema cu e desaroyo di Airbnb como tal, ya cu esaki a bira parti di e estructura turistico di Aruba. “Esey ta un realidad. Loke hotelnan no ta acapara, Airbnb ta acapara,” el a bisa.
Croes a menciona cu hotelnan tambe a expresa preocupacion cu turistanan cu no ta hospeda na hotel ta haci uso di beachnan y otro facilidadnan. Sinembargo, el a indica cu esaki ta un otro aspecto di e discusion cu mester wordo trata separadamente.
Un di e preocupacionnan principal ta e efecto di Airbnb y inversion extranhero riba mercado local di propiedad. Segun Croes, prijsnan den sector di real estate a subi considerablemente, mientras cu hopi propiedad ta wordo ofreci den dollar of euro en bes di Florin.
“Nos mester regla esaki netjes. For di principio nos a bisa cu nos mester proteha e localnan. Loke ta duel nos mas ta cu prijsnan riba mercado di real estate a subi,” Croes a declara.
Pa atende e situacion, Gobierno a tuma un decision den Consheho di Minister algun luna pasa pa aumenta e overdrachtsbelasting y belasting pa personanan di afo cu ta cumpra un cas na Aruba. Segun Croes, e aumento aki no ta aplica na Arubianonan.
E minister a reconoce cu e medida ta solamente un prome paso y cu esaki so no lo produci tur e cambio cu Gobierno kier logra. Un di e siguiente pasonan cu Gobierno kier encurasha ta introduccion di un sistema di registracion pa propiedadnan cu ta opera como Airbnb.
“Ta okay pa pone un Airbnb, pero bo mester cumpli,” Croes a enfatisa.
Minister Croes a conclui cu Gobierno ta den proceso di traha riba regulacion di e sector. Sinembargo, tin ainda hopi detalle legal cu mester wordo analisa y regla cuidadosamente, cu e meta di crea un sistema mas ordena y, na mes momento, proteha e interes di habitantenan local.
