ORANJESTAD (AAN): "Un gobierno no por exigi pa un ciudadano ta vacuna y nos no ta forsa ningun hende pa vacuna tampoco", asina Prome Minister Evelyn Wever-Croes a expresa durante su ultimo rueda di prensa.
El a remarca cu no tin ningun ley cu por exigi un persona pa vacuna. "Claro, nos ta haci un apelacion riba bo si, pasobra cu bo contribucion y cu bo tambe vacuna bo ta yuda cu nos ta yega e meta di 85% y nos tur por flexibilisa y talves laga e tapaboca akinan di berdad cu nos no ta bay tin mester di dje mas", a agrega.
E mandatario a sigui bisa cu gobierno no por exigi esey y no ta exigi esey tampoco, simplemente pasobra no tin un base legal pa hacie. "Nos ta lag'e na cada ken pa tuma su decision si bo ta vacuna si of no".
"Si bo dicidi di no vacuna, carga e responsabilidadnan tambe. Pasobra nos sa con serio e virus aki por causa y con e por afecta salud di hende. Anto na e momento cu bo no a vacuna tene cuenta cu esey por ta e risico tambe", Wever-Croes a enfatisa.
