Thomas Ruiz, vicepresidente di VRA:
- No cu promesa ni espectaculo
ORANJESTAD (AAN)-- Vicepresidente di Vereniging Rijscholen Aruba, señor Thomas Ruiz, siguiendo cu su entrevista cu Matutino DIARIO, tocante e situacion cu tin den e Departamento di Rijbewijs, e expresa cu mester tin bin un “hende di ariba”, cu tin un tiki conocemento di trafico y amor pa trafico tambe, pa dune su prioridad y bin cu un maneho, manera mester ta.
“Y nos ta pidi for di basta tempo caba pa sinta na mesa y te awe nos no a haya invitacion pa sinta na mesa. Cu otro palabra, educacion cu ta esencial pa bo maneho afo. Bo a lanta un Comision y a laga nos afo. Con por ta? Y esaki ta e resultado!” señor Ruiz a remarca.
Tocante e hecho cu Comisario di Polis a bin cu hopi iniciativa pa drecha cosnan na KPA, a puntra señor Ruiz “si asunto di rijbewijs a wordo lubida?”, el a contesta cu hechonan ta papia pa nan mes. “Comisario di Polis enberdad ta traha ‘rond di sucunan’ pero mi ta bolbe bisa, ‘hechonan ta papia pa nan mes’. Si e tabata asina bon den su maneho awo nos coleganan no tabata para pafo, y nos no tabata treciendo dilanti problemanan desde 1920”, Thomas Ruiz a expresa.
El a subraya cu e situacion aki ta perhudicando no solamente e rijscholennan sino trahadornan y doñonan di trabao cu mester di nan rijbewijs pa traha, pueblo completo y comercio.
“Polis ta haciendo un tremendo trabao di controla, pero nan tambe tin cu haci nan trabao”, Ruiz a señala y a agrega cu gobierno mester sinta na mesa, dialoga, tuma un accion concreto no aki un of dos luna, pero awe! Y no promesa falso yen di espectaculo sino accion concreto cu wordo ehecuta.
