Premier Wever-Croes:
ORANJESTAD (AAN): Matutino DIARIO acerca Minister Presidente Evelyn Wever-Croes tocante e retonan cu ainda tin pendiente pa logra e meta, por ehemplo na DIP. E problema ta, falta di personal.
El referi na e Departamento di Infrastructura y Planificacion “DIP”, cu ta keda un di e retonan hopi grandi cu Gobierno tin. Casualmente, DIP tin un presentacion unda nan ta bay mustra tur loke nan a avanza den e retrasonan.
E mandatario a indica cu esaki ta bayendo den bon direccion, ohala por a bay mas lihe, pero lamentablemente e no ta bay asina lihe manera ta Gobierno su deseo.
“Nan ta trahando hopi duro si, pa elimina tur e retrasonan y esey ta toca tur departamento di Gobierno. Nos tin mas departamento cu tin retrasonan serio. Un departamento cu tin ami hopi preocupa ta DIMAS, por ehemplo. Tambe Departamento di Legislacion, Juridische Zaken y Directie Wetgeving tin falta di personal. Departamento di Impuesto a haci un trabao hopi grandi pa elimina atraso den cierto tereno, y tin un retraso ainda riba cartanan di obhecion, pero DIMP tin un bon proyecto hinca den otro, con pa elimina esaki”, Premier Wever-Croes a bisa.
E mandatario a reitera cu tur caminda nan ta trahando pa elimina esey, pero enberdad e ta keda un reto.
E mandatario a reitera cu gobierno tabata busca Hurista, por ehemplo pa Directie Wetgeving y Juridische Zaken cu ta e dos departamentonan cu ta traha ley y consehonan pa gobierno ademas di defende casonan di Gobierno den Corte, y eynan nos mester di Hurista. Premier Wever Croes a enfatiza cu eynan Gobierno mester di Hurista.
E dignatario a menciona Departamento di Relacion Exterior como otro instancia di Gobierno cu tambe mester di Hurista. DIP tambe mester di Hurista pasobra tin hopi cos cu tin di haber cu tereno, tin di haber cu trabaonan huridico.
“Asina tin diferente departamento cu ta cay bao di mi ministerio cu ta buscando hurista y nan no ta haya facilmente.
Nos a papia cu universidad pa wak si studiantenan cu ta den nan ultimo fase caba, lo kier cuminza traha a haya e interes”, e dignatario a indica.
Tambe e ta purbando cu Hulanda pa wak si tin di nos studiantenan di Ley cu ta den e etapa di core stage durante nan estudio, y cu no ta hay’e na Hulanda mes, Gobierno por regla pa nan un stage aki na Aruba, y kizas si nan gusta nan ta keda.
“Kiermen nos ta purbando di tur manera pan nos haya nos hendenan pa yena e funcionnan aki”, Minister Presidente a señala.
