Abogado Desiree Croes:
ORANJESTAD (AAN): Recientemente, Secretario di Estado Hulandes, Alexandra Van Huffelen a pidi pa no yama 'ilegalnan' na e imigrantenan venezolanonan den Caribe Hulandes.
Segun Van Huffelen, e termino aki mester wordo evita.
El a bisa como contesta na e preguntanan di Tweede Kamer, cu el a nota e palabra den e plan anual di Warda Costa di Caribe.
Secretario di Estado a laga sa cu e lo duna mas atencion na e rapportnan futuro di Warda Costa pa asina percura pa e palabra 'ilegal' no wordo uza mas.
E tema aki ta bira uno importante pa tene den consideracion mirando e situacion di e migrantenan na nivel mundial, pre y post covid-19.
Riba e tema aki di migracion, DIARIO tabata tin un entrevista cu Abogado Desiree Croes y el a duna di conoce cu mester bay sinta bek y gobierno mester bay tuma tempo pa mira locual ta mas miho pa e grupo di imigrantenan na Aruba.
Tin mucha y hobennan cu a yega Aruba masha chikito y nan mes ta considera arubiano. No por saca nan di Aruba manda nan bek, Croes a bisa.
Mundo henter a caba di pasa den e pandemia y esey tabata un momento tambe pa mundo reflexiona y realisa cu "nos ta un solo mundo, un solo humanidad y ta mas abierto pa cambionan y pa cambionan sigur mas positivo", e abogado a señala.
A agrega cu e ta sigur c'un persona cu ta sali for di su pais y yega un pais dushi manera Aruba, unda no tin mucho criminalidad y tur cos ta simpel ainda, e ta sigur y el a mira esey tambe cu e personanan aki kier pone nan schouder bao di e progreso di Aruba y tambe forma parti di esaki. "Nos mester ta contento cu e desaroyo ey", a manifesta.
