Ivo Valdes, Presidente di OPPA:
ORANJESTAD (AAN) – Ivo Valdes, Presidente di Organizacion di Pensionadonan Publico di Aruba (OPPA), a bisa den entrevista cu DIARIO, cu na prome instancia, gobierno mester baha su gastonan.
Por ehemplo, Valdes ta puntra pakico Gobierno mester tin tanto oficina cu e ta paga huur, pakico mester tin tanto departamento na luga di ta hunto den un edificio. “Cuanto edificio nos a laga bay perdi, pa bay huur luga priva? Esey caba ta un tipo di maneho cu ta na Aruba so y e pueblo ta toler'e.
“Si nos baha e cantidad di huurnan y baha e gastonan innecesario, por ehemplo: pakico un instancia manera DIMP mester core den un auto di 100 mil florin? Mi mes tin un, pero mi a cumpre 12 aña pasa, tempo cu mi a traha ainda. Awo mi no por cumpra un auto asina” Valdez a comenta.
El a agrega cu e idea ta cu si gobierno baha su gasto, e tin mas cen pa yuda e pueblo, baha e belasting pa e pensionadonan; e pensionadonan semper den nan bida a paga belasting. “Pakico si nan a haya un trabao chikito, ban bisa pa seis of ocho luna, of un aña nan ta haya un entrada extra, riba e entrada ey nan ta pone riba e pensioen y e ta cay den un nivel mas halto di belasting.
Pakico bo mester castig'e? Baja e prijs di costo di bida cu ta den un forma descontrola. Si bo ta bay supermercado cu 100 florin bo n' ta haya nada. Si bo ta bay cu mesun 100 florin e siguiente siman, bo ta haya menos ainda”, Valdes a vocifera.
Ivo Valdes a expresa cu e no ta compronde di con un producto cu ya ta na Aruba caba, den un siman di tempo, toch e ta subi di prijs.
“Mescos e casnan di FCCA unda pensionadonan ta aden, pakico e huur mester subi? Bo no ta mantene e luga; duna mi un argumento fiho y razonable, pa kico bo huur ta subi. Si ami ta trahado, mi ta huur un cas, mi ta gana 4 mil florin, mi a haya un aumento di mil florin y mi entrada a bira 5 mil florin pa luna, anto abo como e doño di cas ta bisa cu bo ta bay subi e prijs di huur. No por! Anto, pakico bo ta hacie cu e pensionadonan? Anto tin hopi cos cu mi ta tende y mi ta wak, e trato cu nos grandinan ta haya ta increible!” Ivo Valdes a remarca.
