ORANJESTAD (AAN): Autoridadnan Mericano a indica Diadomingo, cu nan ta vigilando e caso di barconan crusero cu a wordo afecta pa pashentnan cu Covid-19 abordo, y cu varios di nan a wordo prohibi di ancra na islanan den Caribe y tambe Mexico.
Pero a sali na cla cu awor ta 60 barco ta bao observacion “despues cu casonan raporta di Covid-19 a yega na e drempel pa CDC haci investigacion,” ta loke US Centers for Disease Control and Prevention a bisa. Siman pasa e barco Odyssey of the Seas no a logra drenta e.o. Aruba.
No obstante cu hopi hende a bira malo riba e barconan aki, e no ta strobando pasaheronan cu tin nan pasashinan booked pa e ultimo siman di December, y prome simannan di Januari pa subi barco.
Nan ta bisa cu placa a wordo paga, pues no tin motibo mas pa hala atras.
Carnival Freedom tambe ta un barco cu no por a drenta Aruba. El a regresa bek Miami riba Diadomingo mainta, a baha tur huesped y despues a sali bek cu grupo nobo di pasahero. Carnival a bisa cu si acaso nan wordo prohibi pa drenta cierto isla, cu nan lo bay traha pa haya un destinacion alternativo.
Segun Carnival, nan a informa CDC di tur cos, di e casonan di Covid-19 abordo, di e prohibicion pa drenta Bonaire y Aruba, y a ricibi sosten pa nan protocol y plannan operacional.
