Minister Geoffrey Wever:
ORANJESTAD (AAN): Durante su conferencia di prensa semanal Minister di Finansa Geoffrey Wever a elabora riba ehecucion di e presupuesto 2025 pa e periodo januari pa maart 2025. Cada kwartaal Departamento di Finansa ta compila e “UItvoeringsrapportage” basa riba cifranan preliminario di e administracion central di Pais Aruba y cifranan ricibi di entidadnan cu ta forma parti di e sector colectivo. E sector colectivo ta consisti di Pais Aruba, AZV, SVB, ATA, Serlimar, Stichting EPB y Universidad di Aruba. Pa e periodo di januari te cu maart 2025 Aruba tawata tin un gobierno demisionario ainda.
Segun e uitvoeringsrapportage 2025 pa e prome kwartaal di 2025, a ricibi 424 miyon florin na entrada. Esaki ta igual na 23% di e suma total na entrada riba presupuesto 2025. Pa loke ta trata gastonan di Pais Aruba, den e prome kwartaal gastonan haci a yega un suma di 374 miyon florin na gasto. Esaki ta igual na 21% di e suma total na gasto riba presupuesto 2025. Pais Aruba a paga den e prome kwartaal di 2025 115 miyon florin na debe.
Di e 424 miyon florin na entrada, 122 miyon ta relata na Belasting Directo (29%), 249 miyon ta relata na Belasting Indirecto (60%) y e resto na diferente otro tipo di entrada. Pa loke ta trata Belasting Indirecto, den e prome kwartaal di 2025 a ricibi 15 miyon menos na loonbelasting. E motibo pa esaki ta e cambio den tarifa di e prome bracket di loon- y inkomstenbelasting di 10% pa 0% desde prome di januari 2025.
Pa loke ta trata belasting indirecto manera entre otro BBO y invoerrechten den e prome kwartaal di 2025 a ricibi un total di 221 miyon florin. Esaki ta 20 miyon florin mas compara cu e mesun periodo di 2024 den cual a ricibi 201 miyon florin. Motibo di esaki ta e impacto di e crecemento economico den e prome kwartaal di 2025.
Entrada pa AZV, ATA y SVb ta mustra un crecemento di 261 miyon den e prome kwartaal di 2024 pa 282 miyon florin den e prome kwartaal di 2025. E subida di 22 miyon florin ta e resultado di e crecemento positivo di Aruba su economia.
Den e proke kwartaal di 2025, a realisa un totaal di 370 miyon na gasto. Di esaki, 122 miyon florin ta trata di entre otro gastonan di personal cu ta igual na 24% di e gastonan total riba presupuesto 2025 (509 miyon), 45 miyon na Goederen en Diensten cu ta igual na 23% di e gastonan total riba presupuesto 2025 (193 miyon) y 55 miyon na interes paga riba debenan di Pais Aruba cu ta igual na 19% di e gastonan total na interes riba presupuesto 2025 (294 miyon).
Manera ancra den ley, riba 17 di juni College Aruba Financieel Toezicht (CAft) a duna su conseho riba e prome uitvoeringsrapportage di 2025. Den e conseho aki CAft ta indica cu e resultado financiero pa e prome kwartaal ta mustra un surplus provisional di 1,7%: cu esaki Aruba ta riba e trayecto pa cumpli cu e norma presupuestario pa e sector colectivo. Tambe Aruba ta cumpli provisionalmente cu e norma pa gastonan di personal. Aruba ta riba e trayecto pa yega prome cu 2040 un “Debt-to-GDP-ratio” di 50%. Pa por sigui reduci e debe CAty ta conseha pa haci uzo di e surplus di AZV y SVb. CAft tambe a expresa su preocupacion mirando cu den e prome kwartaal ehecucion di inversionan ta kedando atras. Si mester remarca cu aa e periodo di januari te cu maart 2025 Aruba tawata tin un gobierno demisionario ainda.
E presupuesto 2025 a wordo aproba unanimamente pa Parlamento di Aruba. Den cuadro di transparencia y pa informa na un forma structural, gobierno lo elabora cada kwartaal riba e ehecucion di e presupuesto 2025 segun minister Geoffrey Wever.
