ORANJESTAD (AAN): Minister di Salud y Turismo, Dangui Oduber a indica cu pa loke ta e maneho di Covid-19 pa e turistanan cu ta sali positivo, pa esaki a introduci un seguro di viahe obligatorio
caminda ora cu un turista ta test positivo, e seguro ta cubri e gastonan di acomodacion.
Nan lo mester wordo traslada for di e hotel unda nan tabata inicialmente y nan ta wordo manda na un otro localidad (un acomodacion alternativo). Pero na dado momento, e mandatario a splica, den e ultimo siman di December, a haya confronta cu hopi presion mirando e cantidad halto di turistanan cu a test positivo. Pa e motibo ey, no tabata tin acomodacion alternativo pa nan y mester a sinta delibera cu Aruba Hotel & Tourism Association (AHATA) pa wak si nan ta bay di acuerdo pa mantene isola algun di e guestnan aki.
AHATA a bay di acuerdo pa acomoda algun di e guestnan aki 'on property' pa evita cu nan ta keda riba caya sin acomodacion. E maneho for di principio tabata cu Aruba ta percura cu pa medio di e seguro, cubri nan gastonan di acomodacion den caso di resulta positivo na Covid-19, e mandatario a bisa.
Pa loke ta e seguro di viaha, Minister Oduber a señala cu na comienso di e pandemia, practicamente Aruba tabata pionero den e aspecto aki di seguro. Prome cu Covid-19, e seguronan no tabata tin cobertura pa algo asina ya cu ta algo inusual y despues di 100 aña mundo a experencia un pandemia.
Ora cu a desaroya esaki a tene cuenta cu un dia tin cu bay bek na normalidad y e ora ey ta bay haya e pregunta kico ta bay pasa cu e turistanan cu ta bin Aruba y no tin un seguro.
Minister Dangui Oduber a laga sa cu actualmente ta keda opcional, pero na Merca por ehempel, tambe tin e opcion cu un turista conciente, teniendo cuenta cu e pandemia, lo sigura nan mes.
Si den caso resulta cu e turista no tin seguro, e ora gobierno, basa riba e entradanan cu ta wordo genera, mester percura pa tin un fondo disponibel pa cubri esaki. Mescos ta pasando cu e personanan ilegal cu ta haya Covid-19, cu mester wordo manda afo. Gobierno na final di dia tin cu paga e cuenta aki pasobra nan no tin seguro.
Esey lo pasa mescos cu e turistanan. Despues lo wak ki otro alternativa tin, pero esey ta e pensamento cu Gobierno tin. Esaki ta un proposicion cu gobierno a bin cu ne y tin un trayecto cu mester wordo encamina.
Ta spera cu e pandemia por wordo declara endemico pa e ora ey bin cu un otro maneho, Minister Dangui Oduber a duna di conoce.
