ORANJESTAD (AAN): Nacionan Uni a decreta 9 di december como Dia Internacional contra Corupcion.
Den cuadro di esaki, den nomber di Gabinete Wever-Croes 2, y tambe di parti di Ministerio di Integridad, Minister Ursell Arends ta decreta e siman di 9 di december como Siman Nacional di Integridad.
E Siman Nacional di Integridad di e aña aki (di 5 pa 9 di december) tin como lema "Honra bo compromiso cu integridad".
Tur aña rond di 9 di december, lo tin un siman largo di campaña di conscientisacion pa promove integridad den tur asuntonan di estado y sociedad y e lucha contra corupcion.
E obhetivo ta pa enfoca riba e derecho y responsabilidad di tur hende, incluyendo mandatarionan, funcionarionan, agentenan di ley, medionan di comunicacion, sector priva, sociedad civil, mundo academico, ciudadanonan, mucha- y hobennan, den promove integridad y e lucha contra corupcion. Pues ta enfoca pa tur hende, sea hoben of adulto mayor, tin un rol den preveni y lucha contra corupcion pa asina Aruba por ta un pais resiliente y por promove integridad na tur nivel den sociedad.
Den e siman di conscientisacion lo organiza diferente seminario en cuanto integridad y bon gobernacion (Good governance). Lo organiza actividadnan den scol pa educa nos muchanan y hobennan riba integridad y tambe lo comparti varios informacion via medionan social (pagina di facebook: Minister Ursell Arends en Gabinete Wever Croes) encuanto integridad y preveni corupcion.
Nos lo culmina e siman cu un caminata organiza pa comunidad, Walk for Integrity, Walk for Nature. E caminata ta un caminata pa honra nos naturalesa y lo tuma lugar den parke Arikok, riba diabierna 9 di december cuminsando pa 4.30 di atardi.
Minister Ursell Arends, hunto cu Gobierno di Aruba y tur stakeholders tin como meta pa yega na un Aruba resiliente, sin corrupcion y integro. Pa logra e meta aki ta hopi importante pa conscientisa un y tur riba e importancia di prevencion, e lucha contra corupcion y pa promove integridad na nos pais.
