Parlamentario Setty Yarzagaray:
Presupuesto 2025 entrega na tempo cu resultadonan positivo
ORANJESTAD (AAN): Parlamentario Setty Yarzagaray, di fraccion di MEP a duna di conoce cu diahuebs siman pasa, Minister di Finansas, Xiomara Maduro, hunto cu ehecutivonan di Departamento di Finansas, a entrega Presupuesto 2025 na Parlamento di Aruba, riba un 29 di September, cumpliendo asina pa di tres biaha e record di entrega Presupuesto di Aruba prome cu 1 di September, manera cu ley ta prescribi.
El agrega cu e puntonan principal pa cu e presupuesto ta e normanan cu Pais Aruba tin cu cumpli cu ne pa asina e por wordo aproba hasta pa e comision di CAft como tambe den concordancia cu Hulanda.Un di e puntonan principal ta e norma di e 1% di 'financieringssaldo' cu mester cumpli cu 1% di surplus, den e caso aki. Esaki a cumpli cu 1.8% (0.8% mas cu locual e norma ta indica) cu ta resulta den un surplus di 138 miyon florin, e parlamentario a splica.
El a sigui bisa cu e di dos norma cu mester cumpli cu ne ta e norma di 'personeelslasten norm'. Esaki mester cumpli eigenlijk desde 2027 pa e keda bao di 10% di GDP. Aruba su porcentahe ta abao di 10% menos aña 2020, cu tabata e aña di Covid. Despues di esey pa awo, e ta caba bao di 10% y den aña 2025 e ta proyecta na 6.8%. Esaki bao di 10% prome cu aña 2027 cu ta loke Hulanda ta premira of exigi di Aruba. Ta di remarca tambe cu e 6.8% aki ta cumpliendo cu e trahadonan publico pagando nan indexering for di aña 2018 te cu 2023, a bisa.
Setty Yarzagaray a indica cu gobierno ta cumpliendo cu e normanan prome cu e añanan cu ta indica y ta premira cu hasta miho cu a anticipa. Tambe ta ser exigi pa aña 2031 e debenan na ingreso di Pais Aruba (‘Debt to GDP’) mester cumpli cu 70%. Ya caba ta proyecta pa 2025 yega na e 70% aki, seis aña prome, y ya caba Pais Aruba ta eynan. Si tur cos bay manera ta proyecta, segun economia ta desaroya, segun gobierno ta hiba su maneho den un forma responsabel, lo yega na esaki pa aña 2025, e parlamentario a remarca.
Ademas, si Aruba sigui keda riba e tendencia aki pa aña 2031, Aruba lo cumpli cu 50% di e 'Debt to GPD', segun proyeccion di Departamento di Finansas, esta prome cu 2040 manera Hulanda ta exigi. E parlamentario a enfatisa cu esaki no ta cualkier resultado. Ta resultadonan di un maneho responsabel y tambe cu dedicacion. Eyfo ta tende critica, ta papia di surplus y con a para cu dunamento bek. El a bisa cu awor a yega e ora pasobra ta cumpliendo y esaki ta refleha cu e anuncio y lansamento di diferente proyecto, manera esun di Stichting Hunto, e proyecto di 'studenten flat', Lotto pa Deporte, drechamento di camindanan, entre otro, cu gobierno ta realisando. "Cu kico gobierno ta realisa esaki? Cu hustamente e placa cu nan ta pone disponibel pa ehecuta e proyecto y cu e surplus cu nan ta genera. Pasobra gobierno a bay tambe di inversionnan cu antes tabata masha hopi mes cu awe bo mester paga bek. Pero aworaki responsablemente a cuminsa cu 25 miyon aña pasa y logicamente ora bo surpasa e surplus por crece cu por 'add-on' e lista di proyectonan".
Pa aña 2025 e suma ta na 33 miyon florin y si e economia desaroya miho cu ta anticipa atrobe por agrega proyectonan na esakinan, Yarzagaray a splica. Ya caba Parlamento a trata e presupuesto supletorio di 2024 cu tambe a resulta miho, cu a anticipa y mas placa por wordo aloca na proyectonan. Segun proyeccion di Departamento di Asunto Economico, economia no ta bay crece mesun hopi cu aña anterior, pero ingreso ta mas y den e caso aki e surplus proyecta te aworaki, si e realisa, Aruba por sigui inverti den hopi mas aspecto di e comunidad.
"Pa esaki nos ta aplaudi y elogia Gabinete Wever-Croes I y II y tur profesional cu ta haci esaki posibel. Ora tin critica ariba e resultadonan aki, mi lo bisa esaki: Si bo tabata por hacie miho, bo mester a hacie den bo 8 añanan di abundancia. Den e añanan di crisis (financiero y Covid), cu e tipo di resultadonan aki, ta hendenan cu ta traha cu curason pa Aruba ta logra esakinan. No solamente gobierno, sino e trahadonan, e profesionalnan na e diferente departamentonan cu ta logra pa realisa tur esaki. Pasobra ta na nan e credito mester bin tambe", Parlamentario Setty Yarzagaray a declara.
