Minister di Finanzas a confirma:
*Lo cobra 100% di nan salario desde e luna aki
ORANJESTAD (AAN): Diaranzon atardi den presencia di mayor parti di e ministernan di Gabinete Wever Croes 2, minister di Finanzas y Cultura Xiomara Maduro a tene un rueda di prensa, pa anuncia cu Gobierno di Aruba ta bay paga e empleadonan publico 5% bek.
Maduro a splica cu despues cu Diaranzon mainta Prome Minister Evelyn Wever Croes a papia cu Secretario di Estado van Huffelen, Prome Minster a tuma contacto cu conseho di minster pa tuma un decision.
E decision ta pa Gobierno bay over na paga e ambtenaar e 5%.
“E siman aki tur empleado publico y tambe esnan di e fundacionnan ta haya bek e 5%”.
Pa empleadonan publico e ta bira asina cu nan lo haya 100% bek di locual cu ta nan salario.
Pa e fundacionnan ta bon pa indica cu nan tambe ta haya e 5% , pero ta keda na e fundacionnan con nan ta haci e pago aki bek, segun e mandatario.
El a splica cu pa e empleado publico ta asina cu nan lo cobra 100% di nan salario desde e luna aki.
E minister a bisa si cu tin un diferencia di opinion entre Aruba y Hulanda riba e punto aki.
“Ta asina cu Gobierno di Aruba ta di opinion cu nos ta cumpli cu locual ta e exigencianan cu a wordo poni pa conseho di minister di Reino, e tres condicionnan, pa asina Aruba por bay bek na por paga e 5% y bay over na paga 100% di e salario di e empleado publico”.
E pago di 5% ta presupuesta den e presupuesto di 2022 y nos a mustra CAft tambe con nos ta bay cubri esaki y den opinion di Gobierno esaki ta cubri, segun Maduro.
E minister a indica tambe cu a presenta na Parlamento e proyecto di ley LNT conforme e palabracionnan cu Hulanda.
El a splica cu e politiconan a mantene e recorte di 25% riba nan salario, cu ta un di e condicionnan.
“Ta bon pa trece esaki dilanti, pasobra hopi biaha den discusion publico ta wordo bisa cu no a corta den e salario di e politiconan, siendo cu esey no ta berdad”.
E politiconan ta wordo corta cu 25% den nan salario, segun Maduro.
