Minister Endy Croes:
ORANJESTAD (AAN): Recientemente, Minister di Enseñansa y Deporte Endy Croes a reuni cu e representantenan di Stichting Musica, cual ta e organisacion cu ta organisa Aruba Caiso & Soca Monarch (ACSM) 2024.
E aña binidero Aruba lo ta celebrando Carnaval 70 y e representantenan di Stichting Musica a trece nan peticion pa organisa e ACSM 2024 januari proximo na Joe Laveist Sport Park.
Minister Endy Croes a splica cu Joe Laveist Sport Park ta resorta bou di ASU y FFD, pues Gobierno di Aruba no por tuma decision di esaki. Despues cu Stichting Musica a reuni cu Minister di Deporte Endy Croes, Minister di Cultura Xiomara Maduro y ambos organisacion deportivo cu ta maneha e sport park, esta ASU y FFD, a tuma decision cu ACSM 2024 no lo tuma luga na Joe Laveist Sport Park.
A duna Stichting Musica e oportunidad pa realisa e festival na Joe Laveist Sport Park den condicion cu por proteha e veld, cual lo ta hopi costoso. Tambe, a duna nan e alternativa pa realisa e festival aki na Carnival Village, den cual Gobierno di Aruba lo duna extra sosten financiero pa cera e luga. A evalua e opcionnan hunto y Stichting Musica a opta pa ACSM 2024 tuma luga na Carnival Village.
Stichting Musica a gradici Minister Endy Croes pa e bon consehonan y sosten cu el a brinda pa e plannan di e organisacion. E mandatario di Deporte semper ta habri pa scucha tur organisacion y yuda pensa pa soluciona cualkier inkietud.
Finalmente, Minister Endy Croes ta desea Stichting Musica hopi exito cu Aruba Caiso & Soca Monarch (ACSM) 2024.
