Minister Mervin Wyatt-Ras:
P’asina por yega na miho cuido pa nos grandinan
ORANJESTAD (AAN) Minister di Salud Publico y Asuntonan Social, señora Mervin Wyatt-Ras, den entrevista cu Matutino DIARIO a duna di conoce cu gobierno ta ocupa, conhuntamente cu Stichting SABA y tambe cu casnan priva di cuido di adulto mayor, y Departamento di Adulto Mayor, inventarizando tur tipo di informacion y problematica, p’asina nan por yega na un maneho dirigi riba miho cuido pa nos grandinan.
“Esaki nos ta den e fase inicial ainda, pasobra manera tur hende sa nos ta apenas na seis luna den gobernacion, y nos tin cu haya tur e informacion aki p’asina nos por bin cu maneho riba e asunto aki. Natural, ora cu nos tin un lista di spera e ta importante pa e persona por haya un lugar pero tambe fortifica loke nan tin den mantelzorg tambe. Tin hasta un Stichting di Mantelzoeg, kiermen nos mester bay wak con nos por fortifica esey, cu e personanan cu si ta keda na cas pa wak nan mayornan, cu nan por haya e sosten pa nan por haci e trabao aki”, e dignatario a señala.
El a subraya cu tin hopi hende cu no mester bay un cas di cuido, pero door cu nan yiunan ta traha, nan kier pone nan mayor eyden pasobra nan no por cuida nan.
“Eynan nos ta fortalece tambe e pasadianan, cu tin mas lugar y facilidadnan unda cu mayornan por keda. Mescos cu ora bo hiba un yiu na un crèche nan ta keda durante e dia, e yiu ta sali di trabao ta pasa busca su mayor bay cas. E ora e por drumi trankil, e ta keda den su situacion di ambiente na cas. Nos ta bay den e direccion ey tambe, pero en todo caso, nos ta ocupa ta explora tur e posibilidadnan aki”, Minister Wyatt-Ras a señala.
E mandatario a trece dilanti cu mester bay haci posible cu studiantenan ta wordo interesa pa traha cu nos grandinan. “Nos ta mira cu durante e ultimo añanan e gana ey no tin, of no tin suficiente informacion. Mester bay explora e posibilidadnan di stage den e lugarnan aki cu ta cuida nos hendenan di edad grandi, p’asina nos hobennan interesa, nan por scoge y inspira tambe mirando kico ta wordo haci den e casnan di cuido”, Minister Wyatt-Ras a bisa.
El a indica cu tin biaha tin critica riba e lugarnan aki, pero tin hopi di nan cu ta duna un bon servicio y ta importante pa bay wak cual ta esnan cu ta stimula e studiantenan; anto e ta eleva, tin biaha, e calidad pasobra ora tin studiante cu ta haya un cierto opdracht di scol, e personanan cu ta traha cu e grandinan ta wordo pusha tambe pa haci cierto trabaonan manera cu mester ta.
