Minister Mervin Wyatt-Ras:
ORANJESTAD (AAN) Minister di Salud y Asuntonan Social, señora Mervin Wyatt-Ras, den entrevista cu Matutino DIARIO, a reitera cu e actual gabinete tin solamente un par di luna den gobernacion, mientras cu adictonan ambulante ta un problema di hopi aña caba, y cu a wordo descuida pa siete aña larga sin busca solucion.
E Gobernante a indica cu e gobierno anterior hasta a elimina e posibilidad cu e adictonan aki por bay den curatela pa drenta un institucion. Pues, esaki ta un posibilidad cu a wordo kita, loke ta haci mas dificil pa e gobierno actual busca solucion, y hasta e mesun politiconan ey ta para un banda grita cu no tin solucion.
E dignatario a bisa cu esaki ta un problema cu a crece durante añanan. Gobierno a lanta un Comision hunto cu Ministerio di Husticia, pa por atende cu e asunto aki y crea formanan pa atende cu adultonan. “Nos tin referencianan cu nos ta haci na Curacao y tambe a lanta un taskforce di gobierno unda cu tin diferente entidad y tambe comerciantenan den dje, p’asina atende diferente problemanan den centro di ciudad. Nos ta trahando hunto riba dje, den un solucion. Solucion no ta bin mesora, pasobra si tin un situacion cu a descuida pa siete aña largo, sin pidi e ayudo aki, na e momento aki nos tin cu bin cu ne di nobo, kiermen, esey ta bay tuma su debido tempo”, Minister Wyatt-Ras a subraya.
